U CEM ka KAAC u kwah ban wanrah ïa ka jingsngewpher jaidbynriew hapdeng ki Pnar bad ki Karbi: HANM

Shillong, Naiwieng 30: Ka Hynñiewtrep National Achik Movement (HANM) ha ka sngi Balang ka la pynrem jur bad kynnoh ba ka jingkam u CEM ka Karbi Anglong Autonomous Council (KAAC) u Tuliram Ronghang ba ki khasi-Pnar kiba sah ha ka shnong Mukroh kidei ki poiwir kiba shong ba sah be-aiñ bad ba ki dei ruh kiba donkti ban tuh dieng kaba pynlong ïa ki Pulit Assam kin siat ïap ïa ki. Ka la ong ba kane ka jingkynnoh u CEm ka KACC ka long ban wanrah ïa ka jingsngewpher jaidbynriew hapdeng ki Khasi-Pnar bad ki Karbi kaba lah ban wanrah sha ka jingïa umsnam
Haba kren sha ki lad pathai khubor u Vice President ka seng u Bah Tyllang Thongni u la ong ba ka seng ka kyntait bad ka pynrem jur ïa kane ka jingkren laplah u CEM ka KAAC bad ong ba kane ka jingkren ka long kum ka jingkynshoit ban pynïapher jaidbynriew hapdeng ki Khasi bad ki Karbi
U la ong ba ka jingkheiñ nongbuhai shnong be-aiñ ki para doh para snam ha la ka khyndew ka shyiap ha ki briew ba ju donkti ban kyntur pud sha Meghalaya kan wanrah ïa ka jingïaumsnam hapeng ki Khasi bad Karbi bad dei namar kane ka sorkar jylla ruh kadei ban shimkhia ban ïakren bad ka sorkar Assam.
“Ka sorkar kadei ban shimkhia bad dei ban leh eiei ïa kane ka jingshah kren beiñ ki Khasi-Pnar lym kumta ka seng kan lum ïa ki dkhot ban pahara hi ïa u pud u sam wat lada hap rah tiar ïaleh na ka bynta ka bha ka miat ki paidbah ba shong ba sah ha ki thaiñ khappud” u la ong.
Shuh shuh u la ïathuh ba ka seng kan pyrshah jur ïa ka jingthmu ka Karbi Anglong District Council ban tei mot ïa u pulit ka Assam u ba khlad ha ka jingjia haka 22 tarik mynta u bnai bad kan pyrshah ruh ïa ka jingthmu ban tei ïing skul hapoh u pud u sam hapoh ka shnong Mukroh ka ba dang hap ha Meghalaya.
“Lada ki ïaid sha khmat ka seng kam banse ban phai dien biang ïa kaei kaba ka la leh ha u 2010 ïa ka ktem ki pulit pahara khlaw ka Assm ha ka shnong Umthna,” u la ong.
Haba kren halor ka jingthmu ka sorkar ban buh ïa ka Border Out Post (BOP) ha Mukroh u la ong ba ka jingbuh ka sorkar tang da ka BOP ka lah ban pynlong langkñia pynban ïa ki pulit kiba sah ai jingïada ïa ki nongshnong shnong katei ka thaiñ.
“Ka sorkar Meghalaya ka mut ban buh tang ka BOP katba ka Assam ka la rai ban buh ïa ka ktem ki Assam Battalion, Assam Police bad ruh ki CRP bad kane ka lah ban pynlong langkñia pynban ïa ki pulit kiba sah ban ai jingïada ïa katei ka thaiñ namar ka Assam kan buh haduh lai kynhun ki nongpahara jong ka katba na ka liang ka jylla kan buh tang ka BOP,” u la ong.
Lah ban kdew ba u CEM ka Karbi Anlong District Council u Tuliram Ronghang ha ka jingleit jurip ïa ka thaiñ Mukroh u la kam ba ki Khasi-Pnar ba ba shong ba sah hapoh ka thaiñ Mukroh kidei kiba shu buhai shnong bad kidei ki nongtuh dieng na ki khlaw kiba hap ha ka jylli synshar ka Assam.