U Blei U la pyllait im ïa nga, namar U don ka daw bad kata ka long ban pyllait im ïa ka Ri

Washington, Naiwieng 06: “U Blei U la pyllait im ïa nga namar kadon ka daw bad kata ka daw ka long ba ngan pyllait im ïa ka ri Amerika bad ban pynlong biang ïa ka kum ka ri kaba khraw”, la ong u Donald Trump hadien ba u la jop biang kum u President ka United States of America (USA).
U Trump uba la jop pyrshah ïa ka Kyrtong jong ka Democratic Party, ka Kamala Harris da kaba u la tam ïa ka Electoral Vote kaba udei ban ïoh 270 vote na ki 538 tylli ki electoral vote.
Kane kadei ka sien kaba ar ba u Trump un jop kum u President ka USA. U la jop nyngkong ha u snem 2016, u la rem salit noh ha u snem 2020 ha u Joe Biden.
Lah ban kdew hangne ba ha ka 13 tarik u Naitung mynta ka snem, katba u Trump u dang ïalap elekshon ha ka jylla Pensylvania, ka la don ka jingpyrshang ban shim ïa ka jingim jong u, haba uwei u briew, u la siat na jngai da ka Sniper Rifle, tangba u kuli u la shu dei salit ïa ka skhor jong u. Une uba siat ïa u Trump, u la shah siat ïap noh ha ki Pulit pahara jong ka Amerika. Kham hadien ka la don biang ka jingpyrshang ban siat ïa u Trump katba u dang don ha kawei na ki jaka ïalehkai Golf, hynrei ki nongpahara ki la ïoh kem noh ïa une u briew.
Ha kane ka jingkren jong u sha ki nongkyrshan, u Trump u ban long u President ba 47 jong ka Amerika, u la ong ba ka jingjop jong u, kadei ka jingjop biang jong ka jingsynshar paidbah ha ri Amerika bad kadei ka lad ba ka ri kan long biang ka ri kaba khraw ha ka pyrthei. “Khublei shibun eh ïa ka jingtrei shitom jong phi bad nga ngeit kan long ka lynti ban ngin pynlong biang ïa ka Amerika ka ri kaba khraw bor ha ka pyrthei, ka nongïalam ha ka pyrthei”, u la ong.
Ki nongïalam jong ki ri ka pyrthei, kynthup ïa u Myntri Rangbah duh jong ka ri India, u Narendra Modi ki la ai khublei kitbok ïa u Trump bad kular ban ai ka jingïatreilang bad u.