U Bah Lee Bareh u don ka jingkyrmen ban jop na Jirang, ka BJP kam dei ban bakla ai tiket, ong ki nongïalam BJP na Jirang

0

Nongpoh, Rymphang 01: Shuwa ba ka party BJP kan pynbna ïaka tiket ïa u lane ka kyrtong ban ïakhun na katei ka Constituency ha kane ka elekshon ban wan, ki nongïalam ba hakhmat eh jong ka BJP Jirang Mondal haka jingïalam jong u Bah Francis Ryntathiang kum u President mynta ka sngi kila leit ban kynduh kyrpang ïa u District President jong ka BJP ban pynsngew pynsngap ïaka jingkwah jong ki paidbah ka Jirang ban long kum u kyrtong ka BJP ha kane ka elekshon ban wan.
Katei ka jingleit kynduh kyrpang jong ki nongïalam ka BJP Jirang Mondal bad ki nongïalam ka District ka dei ba kim kwah ba ka party kan bakla haka rukom ai tiket, hynrei kumba ki paidbah ki thrang bad angnud, ki kwah ba ka party kan pynbna ïa u Bah Lee Bareh kum u kyrtong ka BJP u ba la lur bad trei shitom ha katei ka Constituency bad don jingkyrmen ruh ban rah ïaka jingjop.
Haba kren sha ki lad pathai khubor naka liang u Bah Francis Ryntathiang kum u President jong ka Jirang Mondal u la ong ba ka jingwan jong ki ban kynduh ïa ki nongïalam jong ka District ka long halor ka jingwan rung ka Riya Sangma ban kam ïalade kum ka Kyrtong bad ban pan ruh ïaka ticket ban ïakhun ïaka election MLA na Jirang Constituency.
U la ong ruh ba kane ka briew ka ba ladep ban pynbna paidbah ïalade ha ki Social Media ba ka la dei ka kyrtong jong ka BJP ban ïakhun na Jirang kam shem ladon ka jingïatrei lang ki nongkitkam jong ka Jirang Mondal bad kim shem la ithuh ruh ïaka.
Shuh shuh u la pynpaw ba kum ki nongtrei jong ka Jirang Mondal ha ryngkat bad ki paidbah ki kyrpad ïaki nongïalam jong ka BJP ba kin pyntikna ïaka ticket ha Jirang sha u Bah Lee Bareh, namar une u briew u la trei shitom naduh ba sdang ryngkat bad ki nongkitkam bad ki paidbah jong ka Jirang ki la don ka jingshañiah ha u bad u ba la don ruh ïaka jingkyrmen ban jop na Jirang Constituency.
U la ong ruh ba naka liang ki nongkitkam jong ka Jirang Mondal kila kren shai ba lada ka jingai tiket ha Jirang Constituency kan bakla, kum ki nongïalam bad ki nongkitkam kin sa shong pyrkhat biang ban shim pat da kiwei ki lad ki lynti.
Naka liang u President ka BJP Ri-Bhoi District, u Bah Skhem B Swett u la ong ba hadien ka jingwan jong ki Jirang Mondal Committee ban pynsngew pynsngap ïaki jingeh ba ki mat ha shwa ba ki nongïalam ba halor kin pynbna ïaka ticket ban ïakhun ïa kane ka elekshon na Jirang Constituency, u la dep ban ïatai sani bha halor katei ka phang bad iohi ruh baka BJP ha Jirang kala sdang ban suhthied naduh ba u Bah Lee Bareh u la sdang ban trei bad don ka jingthmu ban ïakhun na katei ka Constituency.
U la ong ruh ba kum u nongïalam haka District u iohi ïaka jingtrei shitom jong ka u Bah Lee Bareh bad u donhok ban ioh ïaka tiket ban long u kyrtong ka BJP na Jirang Constituency namar u dei u briew u ba don ka jingïatreilang bad ki nongïalam ka District bad halor katei ka jingkyrpad jong ki nongïalam ka Jirang Mondal, kum u nongïalam ka District u sngewdei ban ai ka jingkyrshan lang bad buh ka jingkyrpad sha ki nongïalam ba halor ban ailad ïa u Bah Lee Bareh ïaka tiket BJP ban ïakhun na Jirang Constituency.
Ha Kane ka jingïakynduh ïaki nongkitkam jong ka BJP District la donlang ruh da u Vice President Samla Micheal Firstborn Madur, President Mahila Morcha Kong Langtimai Diengdoh, Vice President Mondal Jirang, Pradeep Marak, Secretary Mahila Morcha Kong Same Sangma bad kiwei kiwei dkhot jong ka BJP Jirang Mondal.

Leave A Reply

Your email address will not be published.