U-20 Women’s Asian Cup: Pynkut ka India da ka jingjop ïa ka Chinese Taiwan; ïoh mih madan ka Ribansi Jamu

Shillong, ïaïong 08: Ka kynhun ki thei ïalehkai ka India ki la jop ïa ka jingïalehkai ba khatduh jong ka AFC U-20 Women’s Asian Cup 2026 da kaba pynliem ïa ka Chinese Taipei (Taiwan) da 3-1 ha ka Group C ha Pathum Thani, Thailand, hynne ka sngi.
Ka Sibani Devi Nongmeikapam (32’, 87’P) ka la pynkhihjar ar sien, katba kawei pat ka kol la thep da ka Bhumika Devi Khumukcham (26’). Na ka bynta ka Chinese Taipei, ka shi kol la thep da ka Kao Hsin (90+3’) ha ki minit pynjlan ba khatduh shuwa ban kut.
Kane kadei ka jingjop kaba nyngkong jong ka India ha ka lympung AFC U-20 Women’s Asian Cup naduh u snem 2004 kaba bud hadien ka jingshah rem ha ka Japan bad Australia.
Hynrei ka India ka la khyllem noh na kane ka lympung hadien ba ka Uzbekistan ka la jop ïa ka Jordan da 4-0 ha ka Group B. Ka India ka donkam ïa katei ka jingïakhun ban ïakhaid khnang ban ïohrung sha ka Quarterfinal. Ki ar tylli ki kynhun ba wan ha khlieh duh na kawei pa kawei ka Group bad ar tylli ki kynhun kyrdan ba lai ba kham kynsai na baroh lai tylli ki Group kin ïoh rung sha ka Quarter final, ïa kaba ka India ka la duh.
Wat la katta ruh, ka khubor kaba khraw na ka bynta ka jylla Meghalaya ka long ba ka nongapkol jong ka jylla ka Ribansi Jamu, ka la ïoh ban mih madan ha ka sien ba nyngkong eh na ka bynta ka ri ha kane ka lympung ïalehkai.
Ki thei ïalehkai ka U20 ka India kiba la mih madan: Ribansi Jamu (GK), Thoibisana Chanu Toijam, Pooja (Shilji Shaji 84’), Sibani Devi Nongmeikapam, Lhingdeikim, Bhumika Devi Khumukcham, Remi Thokchom, Shubhangi Singh (C) (Shruti Kumari 67’), Anju Chanu Kayenpaibam, Sulanjana Raul (Neha 67’), Cindy Colney.