U-19 Boys Inter District Cricket Tournament: Pynliem ka West Jaintia Hills DCA ïa ka West Khasi Hills DCA
Shillong, Nailur 25: Ka kynhun lehkai kriket jong ka West Jaintia Hills District Cricket Association hynne ka Lah Sngi U Blei ka la pynliem ïa ka West Khasi Hills DCA da hynñiew wicket ha ka jingïakhun kaba la long na ka Zone 1 – Group B jong ka lympung Meghalaya Cricket Association’s U-19 Boys Inter District Cricket Tournament kaba la long ha Umbuda, Nongpoh.
Ha kane ka jingïakhun, u Maremdor Sutnga u la lah ban kyrshan ha baroh ki liang, kata ha ka tied bad bol (bat & ball) bad hadien ba la kut ka jingïalehkai u la khur ïa ka khusnam Player of the Match. U la khur haduh 4/21 ha kaba ka WKH ka la shah pynkhyllem baroh tang 101 ron bad hadien nangta u la kamai 34 khlem da shah pynhap.
Ka WKH ka la jied ban tied nyngkong hadien ba jop ïa kaba kynting (toss) hynrei baroh ki nongtied ki la shah pynhap noh tang ha ka 23.1 over. Ki la don bun ki wicket kiba la shah pynhap khlem da lah ban kyntiew ïa ka ron na bynta ka kynhun kaba la ban khia sha u Pynierlang Shangdier, u ba la khyrwit haduh 47ron tang na ki 33 bol, da kaba khyrwit saw tylli ki fours bad saw tylli ki six.
Napdeng ki rangkawangbol, u Maremdor u la long u ba seisohtam na ka WJH u ba la khur haduh 4 ngut tang na ki 4.1 over. Katba u Namewanki Pakyntein, u ba la ïoh ban kawang 7 over u la ïoh ban khur 4/29.
Haba beh ïa ka thong ka West Jaintia Hills District Cricket Association ka la duh lai ngut ki wicket, hynrei kane kam shym la long ka jingma ïa ka WJH, ha kaba kane ka ka kynhun ka la lah ban pyndep ban kynjoh sha ka ron ba la buh tang na ki 12 over, da kaba kamai 8.58 ron man ka over.
U Maremdor u la tied 34 ron na ki 26 bol bad na ka liang jong u Namewanki u la ïaineh ryngkat da 12 ron khlem shah pynhap (not out). Katba u Ewanmidao Pyrtuh u la ïarap 19 ron na ki 16 bol shuwa ban shah pynhap, bad ki la don haduh 22 tylli ki wide kiba la ïarap shibun ïa ka West Jaintia Hills District Cricket Association ban ïa ka thong ba la buh.
Mynta ka sngi ka jingïakhun kan long hapdeng ka Shillong Cricket Association A pyrshah ïa ka East Jaintia Hills DCA na ka Zone 1 jong ka Group A.