Da 5-1 pynliem ka Jaguar FC ïaka Blue Bombers FC

Nongpoh, Nailur 24: Ka Jaguar FC kala long ka lahduh haka lympung ïalehkai phutbol bala pynlong da ka Ri Khasi Social and Cultural Sports Club hadien ba kala lah ban pynliem noh ïaka Blue Bombers FC da 5-1 kol haka jingïakhun phainal kaba la long haka sngi Saitjaiñ ha madan ïalehkai Kurkalang kaba don ha Bhoirymbong Lumdaitkhla kaba dei kawei naki lympung ïalehkai ba heh ha katei ka thaiñ.
Da ki hajar ngut ki paidbah nongpeitkai kila wan ban sakhi ha katei ka sngi ban ai jingïakyrshan ïala ki jong ki kynhun bad ïa katei ka lympung ïalehkai phutbol kaba heh ha katei ka madan, ba la wan ban pynhap pyrda noh ïaka da u Bah Damanbait Lamare MLA ka Umroi kum u kongsan, haka jingdonlang u Bah R Kharbuki MDC, Raja Brahma ADC, Bah Dasakhiatbha Lamare MLA barim ka Mawhati, Bah Kitborlang Nongrem President NPYF bad kiwei kiwei ki riew rangbah bad ki nongïalam jong ka RKSCSC.
Haba phai sha ka jingïakhun phainal ha katei ka sngi ka jingïalehkai hapdeng ka Jaguar FC pyrshah ïaka Blue Bombers FC kala long ka jingïakhun kaba khluid bad hapdeng ka jingïakhun kaba jur ka Jaguar FC kala ioh ban pynkhih nyngkong ïaka jar haka kylla step bad haduh ba kut ka kylla step ka Blue Bombers FC kam lah ban pynphai shuh ïa katei ka shi kol.
Haba phai sha ka kylla miet ka jingïakhun kala nang khluid ha kaba ki rangïalehkai jong ka Jaguar FC kila ioh ban thep sa 4 kol ban pynjem khnap syndon ïaki rangïalehkai jong ka Blue Bombers hynrei haka minit bala jan kut ka Blue Bombers kala ioh ban pynphai tang shi kol bala pynlong ïaka Jaguar FC ban rah syndon ïaka nam lahduh jong katei ka lympung hadien ba pynliem ïaka Blue Bombers da 5-1 kol.
Naka liang ka RKSCSC kala sam ruh ïaka khusnam pisa ha katei ka sngi ha kaba ka Jaguar FC kaba long ka lahduh kala ioh ban rah ïaka song pisa kaba T.5 lakh lem bad ka trophy katba ka Blue Bombers FC kala ioh ban rah ïaka song pisa kaba T.2 Lakh lem bad ka trophy nalor kiwei ki khusnam shimet