U-19 Boys Inter District Cricket: Jop ka East Khasi Hills Cricket Association bad ka East Garo Hills DCA

Shillong, Nailur 19: Ka kynhun lehkai jong ka East Khasi Hills Cricket Association ka la lah ban sei madan ïa ka jingkhlaiñbor jong ka da kaba pynliem kput ïa ka West Khasi Hills District Cricket Association haduh 159 ron jong ka lympung lehkai jong ka Meghalaya Cricket Association’s U-19 Boys Inter District Cricket Tournament.
Katba ha kawei pat ka jingïakhun, la sakhi ïa ka East Garo Hills DCA kaba la lah ban pynkhyllem ïa baroh ki wicket jong ka North Garo Hills DCA ha ka jingïalehkai ba ka ron ka long tang khyndiat ban khur ïa ka namjop da 19 ron hapoh jong ka Zone 2.
Ha ka jingïalehkai kaba la long ha Umbuda, Nongpoh, ki rangïalehkai ka EKH ki la shah pyntied nyngkong bad ka kynhun ka la ïoh ban buh ïa ka thong da 216 ron, shah pynhap 3 wicket naki 28 over.
Ki ar ngut ki rangtied ka EKH ba nakhmat ki la lah ban kyntiew ïa ka ron na bynta ka kynhun, ha kaba u Despenly Syiemlieh u la lah ban khyrwit haduh 85 naki 76 bol (7x4s, 3x6s) khlem shah pynhap katba u Arwanbiang Shang-pliang u la ïoh ban ïarap 62 na ki 59 bol (7x4s, 3x6s), ryngkatlang ki la kyntiew da 109 ron shuwa ban hap shi wicket, kaba la pyndkhut noh da u Gabriel Thabah, u ba la pyndep ïa ka over ka jong u da 2/45.
Haba beh ïa katei ka thong, ki nongtied ka WKH ki la shem jingeh bad shah pynhap uwei hadien u wei bad kynjoh tang sha ka 57 na ki 15.4 over, bad ka namtam ka long sha u Daulabiang Shangpliang, u ba la khur haduh 6/15 na ki 3.4 over. U Banpynkmen Kharsyntiew jong ka WKH u la ïoh ban ïarap 11 ron hynrei kam shym la lah ban ïarap ban pyllait ïa ka kynhun na ka namrem.
Ka jingïakhun kaba la long Salpara, Mendipathar, ka EGH ka la bteng ïa ka namjop kaba ar sien pyrshah ïa ka NGH; dang hynnin ka sngi Nyngkong ka la jop ïa ka South Garo Hills DCA da phra wicket.
Ka EGH ka la ïoh ban tied nyngkong hadien ba jop ïa ka toss hynrei shah pynhap baroh tang hadien ba kynjoh sha ka 137 ron na ki 23.4 over (jong ka 25 over). U Lensbirth N Marak (53 ron na ki 51 bol, 4x4s, 3x6s) ha ryngkat ka jingkyrshan na u paralok jong u, u Thunun N Marak, u ba la kamai 39 (1x4s, 3x6s).
U Dorith Marak u la long u ba seisoh na bynta ka NGH, da kaba khur haduh 4/44 na ki 4.4 over. U Fraidian Momin (2/9) bad u Chongkam Marak (2/15) ki la ïoh ban khur mar 2 wicket.
Katba ka NGH ka la shah pynkhyllem baroh ki wicket tang ha ka 118 ron na ki 23.1 over. U Rituraj u la ïoh ban khyrwit 37ron na ki 35 bol (1x4s, 3x6s), katba u Dallang Sangma u la ïoh ban ïarap 24 bol na ki 28. Ka NGH ka la shah pynpulom ha ka por ba ka ïaleh ban beh ïa ka ron dei lyngba ka jinglah ban lehkaibha u Gulgul Sangma, u ba la khyrwit 4 wicket bad ailad tang 8 ron na ki 5 over ki jong u, katba u Andam N Marak u la ïoh ban khur 2/17 na ki 4.1 over.
Ka jingïalehkai mynta ka sngi, yn sakhi ïa ka Ri-Bhoi DCA ka ban sa aireng pyrshah ïa ka East Jaintia Hills DCA na ka Zone 1 jong ka Group A, katba ka South Garo Hills kan aireng pyrshah ïa ka Tura DCA na ka Zone 2.