Shillong, Nailar 25: Ka Nongjri Presbyterian Secondary School na Ri-Bhoi District ba mihkhmat ïa ka Jylla Meghalaya ka la jam mynta sha ka wat ïakhun Semi final ha ka lympung ïalehkai phutbol U-15 boys’ Subroto Cup 2024, bad kane la pynthikna hadien ba ka la pynliem noh ïa ka Army Boys Company da 2-0 kol ha ka jingïakhun ïa ka quarterfinal ha Bangalore ha ka Sngi Saitjaiñ (24 tarik, Nailar).
Ha kane ka jingïalehkai u Nangsanbha Warjri lem bad u Chanjib Chetry ki la ïoh ban pynkhihjar mar kawei na bynta ka Meghalaya. U Chanjib, u la kylla long u rangthep kol ba kynsai ka kynhun, ha kaba u la ïoh ban pynkhihjar man ki jingïakhun bad kynjoh mynta 11 kol naduh ba sdang ka lympung.
Kumban shu kdew, ka Nongjri Presbyterian Secondary School na Ri-Bhoi District ka la ïoh ban mihkhmat ïa ka jylla Meghalaya sha kane ka lympung U-15 boys hadien ba ka la rah ïa ka state-level Subroto Cup ha u bnai ba ladep.
Ha kane ka lympung ka kynhun ïalehkai Under-15 jong ka Meghalaya ka la jop baroh lai sien lynter ki jingïalehkai na ka Group B, da kaba sdang jingjop da 6-0 kol pyrshah ïa ka kynhun na Sri Lanka, hadien nangta ka la jop da 7-0 kol ïa ka ISSO, bad da 8-0 kol ïa ka Dadra & Nagar Haveli and Daman & Diu. Ha kine baroh lai tylli ki jingïalehkai, u Chanjib u la ïoh ban khyrwit hat-trick lai sien lynter.
Da kane ka namjop ka kynhun ïalehkai Under-15 ka Meghalaya kan pynkhreh ban ïatynjuhbor pyrshah ïa ka Bangladesh ha ka semifinal, ka ban long mynta ka sngi ha ka por 3 baje nohphaisngi ha ASC Centre.
