Meghalaya Youth League 2024: Wanphai biang ka Pyndengumiong ha ka kyrdan ba nyngkong ha ka thup U-14
Shillong, Nailar 25: Ki jingïalehkai ha ka Sngi Saitjaiñ ki la long kiba itynnat ha ka lympung Meghalaya Youth League 2024 ha kaba ki la don katto katne ki kynhun kiba la jop ki la lah ban wanrah jingkylla ha ki kyrdan jong ka miej kheiñ point.
Ha ka Zone D la sakhi ïa ka Pyndengumiong District Sports Association kaba la lamkhmat biang ïa ka kyrdan U-14 hadien ba jop da 2-0 ïa ka Mawshynrut Sports Association. Katba ka Nongstoin District Sports Association ka la ïakhaid da mar 1-1 kol bad ka Eastern Border Sports Association, kaba mut ba ka Pyndengumiong ka ïoh mynta 14 point, bud sa ka Nongstoin kaba kamai 13 point.
Ha kawei pat ka jingïalehkai na kane ka thup la sakhi ïa ka Mawkyrwat District Sports Association kaba la pynjemkhnap ïa ka Tyrsad Area Sports Association da 5-0 ban jam sha ka kyrdan ba lai da 11 point.
Ha ka kyrdan ïalehkai U-16 (Zone-D), ka long ka resol kaba sngewtynnat ïa ka Eastern Border, haba lehkai hala ïing, kaba la pynliem noh ïa ka Nongstoin da 4-1 kol. Kane ka dei ruh ka namrem kaba nyngkong ïa ka Nongstoin ha kane ka kyrdan hynrei ka la ïoh khur lypa 13 point bad ka dang ïaineh ha ka kyrdan ba nyngkong. Ka Pyndengumiong ka la jop da 2-1 kol ïa ka Mawshynrut, katba ka Tyrsad ka la pynliem da tang 1 kol ïa ka Mawkyrwat.
Na ka Zone C ka la don tang kawei ka jingïalehkai, kata ha ka U-16 hapdeng ka Riwar Mihngi Football Association bad ka Western Ri-Bhoi Sports Association, ha kaba ka jingïalehkai ka la kut ha ka jingïakhaid da mar 2-2 kol.
Ka Amlarem Block Sports Association ka la long ka kynhun kaba la seisoh tam na ka Zone B ha ka Sngi Saitjaiñ, hadien ba pynliem da 6-0 kol ïa ka Laskein Block Sports Association ha ka Under-14 bad da 3-0 kol ha ka U-16. Nangta ka Saipung Block Sports Association ka la jop salit da 1-0 ha ka U-14 bad da 2-1 kol ha ka U-16 pyrshah ïa ka East Jaintia District Football Association.
Haba jam sha ki jingïalehkai na ka Zone A, la sakhi ïa ka Tura District Football Association bad ka North Garo Hills District Sports Association kiba la jop mar kawei ka jingïalehkai. Ka Tura ka la pynliem ïa ka North Garo Hills ha ka U-14 da 4-0 kol, ha kaba u Wanchiang K Marak u la khyrwit da ka hat-trick, katba ha ka Under-16 ka NGH ka la pynliem kylla ïa ka Tura da 2-0 kol.