Mynta yn ïaknieh rung final ar tylli ki klob ka thaiñ shatei lammihngi ha ka 133rd Durand Cup 2024

SHILLONG, Nailar 25: Ka Shillong Lajong FC mynta ka sngi kan sa pdiang ïa ka NorthEast United FC ha ka jingïalehkai ban long ha la ïing, ha kaba kine ar tylli kin ïatynjuhbor ha ka jingïakhun kaba la tip da ka ‘NorthEast Derby’ ban ïaknieh rung final ha ka 133rd IndianOil Durand Cup ban long ha Jawaharlal Nehru Stadium, Shillong.
Kane ka jingïalehkai kaba la khreh ban pynlong ha nongbah Kolkata la pynkynriah noh ha Shillong, namar ka jingkyrpad kaba jur na ki paid riew ieid phutbol ka jylla ban pynlong ïa ka semi final ha kane ka nongbah, bad na ka liang jong ka Sorkar Jylla Meghalaya ka la lah ban pynkohnguh ïa ka Organising Committee jong ka Durand Cup ban pynurlong ïa ka jingkwah u paidbah.
Haba phai sha ka NorthEast United, ka kynhun ka la lah ban pynkhyllem noh ïa ka Indian Army ha ka quarterfinal da 2-0 kol ha Kokrajhar katba ka Shillong Lajong ka la pynkyndit da kaba pynliem noh ïa ka klob ba radbah na Kolkata – ka Emami East Bengal hakhmat ki nongkyrshan da 2-1 kol ban buh jaka ïalade haka semi-final.
Kumba la sakhi, man ki jingïalehkai ba ka Lajong ka ïakhun ka stadium ka la dap smam da u paid nongkyrshan, bad la thikna ruh ba kane ka semi-final ban long mynta ka sngi (26 tarik) yn ïalehkai hapoh ka stadium ka ban shlei da u paidbah ba wan kyrshan ïala ka jong ka kynhun ba ki sngewtynnat.
Haba ngi peit ïa ka Shillong Lajong FC, ka la ïalehkai bha naduh ba sdang ka lympung ban long lahduh ruh na ka Group-F bad pynliem ïa ka East Bengal ha ka quarterfinal, da kaba pyndonkam ïa ka rukom lehkai kaba kyntiak. Ka long kaba skhem ha bak bad pynsmiej ha bun ki khep ïa ka East Bengal da ka rukom ban shu rah kyndit kyndit ïa ka bol lada ka ïohlad.
Ka jingpyrshang ban shna ïa ki kabu ka la long kaba ishongkun, bad ki bol pashat na u kapten ka kynhun- u Hardy Nongbri ki la long ki jingma ba khraw ïa man ki kynhun ba ïakynduh pyrshah. Napdeng ki player, u Marcos Rudwere Silva u la long hakhmat ban pynkhihjar ïa ka kynhun, katba u Phrangki Buam bad u Everbrightson Sana ki long kiba kynsai ha ka jinglah jong ki ba pashat bol hapoh phyllaw kol ka liang pyrshah. Ka kut ba skhem ba la ïalam da u Daniel Goncalves (Brazil) ka la long kaba jwat ïa ki player ka liang pyrshah, bad haduh mynta ka kynhun ka dang shah thep tang 2 kol.
Haba kren shuwa ka jingïalehkai, u Head Coach ka Shillong Lajong FC, u Jose Hevia u la ong, “Ka semi-final lashai ka sngi (26 tarik Nailar) ka dei ka jingïalehkai kaba khraw ïa ka klob, ïa ki nongkyrshan bad ïa baroh ha Meghalaya. Baroh Ngi la pynkhreh bha ïa kane ka jingïakhun bad Ngin sei lut la i bor i sor pyrshah ïa kane ka kynhun ba khlaiñbor.”
“Ngi sngewshong shit bha na bynta ka jingïalehkai lashai ka sngi bad Ngin sa pyndonkam ïa ka rukom ïalehkai ka klob hakhmat ki nongkyrshan ba ïaineh jong Ngi. Ka NorthEast ka dei ka kynhun kaba biang bad Ngin sa mad ïa ka jingïakhun kaba itynnat pyrshah ïa ka”, la bynrap u kapten ka Shillong Lajong, u Harry Nongbri.
Ha kawei pat ka liang, ka NorthEast United ka la seisoh bha khamtam ki player turkhmat, ha kaba ka la ïoh ban thep haduh 10 kol ha ka group stage. Ka jingïatreilang hapdeng u Jithin M.S, Guillermo Fernandez bad u Nestor Albiach ki la long ka jingma ba khraw ryngkat ka jingkyrshan na u midfield na Morocco – u Mohammed Ali Bemmamer. U Guillermo Fernandez (Spain) bad u Nestor Albiach ki dei kiba la pynkhihjar ha ka quarterfinal. Ka kut ba skhem jong ka NEUFC ka la long shisha kaba skhem, bad haduh mynta ka dang shah thep tang 1 kol.
“Kan long ka jingïalehkai kaba itynnat ba Ngin mad ha ka semi-final ha kum kane ka lympung kaba paw hakhmat ki nongkyrshan jong Ngi bad ruh hapoh ka Stadium ka ban sa shlei da u paidbah, la ong u Head Coach ka NorthEast United – u Juan Pedro Benali shuwa ban jam sha ka sngi ïalehkai.
Haba kylli shaphang ka jingeh haba ïalehkai hakhmat ki nongkyrshan na shabar, u ne u Coach tynrai na Spain u la jubab, “Ha jingshisha ka long da kum-wei, Ngi sngewtynnat ban ïalehkai hapoh ka stadium kaba shlei da u paidbah. Ka ïarap ïa ki player ban don ïa ka mynsiem ïakhun bad ban ïalehkai laitluid ban ïoh ïa ka resol kaba bha na bynta ka kynhun.”