Yn pyni Giant Screen ïaka jingïakhun Semi-Final ka Shillong Lajong bad NEUFC ha 2 tylli ki jaka ha Ri-Bhoi

Nongpoh, Nailar 25: Ka Directorate of Sports and Youth Affairs ryngkat ka jingïatreilang bad ka ophis u Deputy Commissioner ka Ri-Bhoi District bad ka ophis u Sub Divisional Officer ka Patharkhmah Civil Sub Division kila rai ban pyni da ki Giant Screen ïaka jingïakhun Semi Final ka Durand Cup hapdeng ka Shillong Lajong pyrshah ïaka North East United FC ha madan JN Stadium ha nongbah Shillong haka 26 tarik Nailar.
Katei ka jingïakhun hapdeng kitei ki 2 tylli ki kynhun ba khlaiñ kan dei kawei naki jingïakhun ba ki paidbah ki ap khmih lynti ban sakhi bad kiba bun ki riew ïeid phutbol ka jylla Meghalaya kila pyrshang ban ioh ïaki tiket ban sakhi beit ha madan, hynrei namar kiba bun kim shym la ioh kumta naka liang ka sorkar kala pynkhreh ban pyni da ki Giant Screen haki ar tylli ki jaka haka thaiñ Ri-Bhoi kata ha Madan NSCA Pahamsyiem bad ha Patharkhmah Govt. HSS.
Naka liang u Bah MB Tongper ADC ka Ri-Bhoi u la pyntip ba katei ka jingpyni Live Screening ïaka jingïakhun Semi-Final kan sdang naduh ka por 5:30 janmiet bad u la khot bad wer ïaki paidbah ban wan sakhi hakitei ki jaka ba la pynkhreh bad kan don ruh ka DJ Night ban pynbyrngia ïaki paidbah.