Shillong, ïaïong 12: Ka Meghalaya ka la pyni ïa ka jingïalehkai kaba thikna ha ka Online National Kettlebell Sport Championship, kaba la pynkut dang shen ha Goa, da kaba khur baroh 13 tylli ki takma—ba kynthup ïa 9 tylli ki takma ksiar, 3 tylli ki takma rupa, bad kawei ka takma rnong. Ka jylla ka la wan ha ka kyrdan ba-ar ha ka jingkheiñ kyllum, hadien ka Maharashtra, kaba wan hakhmat duh ha ka jingïoh takma, katba ka Uttarakhand ka wan ha ka kyrdan kaba lai.
Ka jingjop ba seisoh jong ka Meghalaya ha ka kyrdan jong ka ri ka la pynpaw biang sa shisien ïa ka jingroi jong ka jylla ha ka jingïalehkai kettlebell.
Ha ka jingïakob ïalehkai One Arm 10-Minute Clean & Jerk, ki nongïalehkai ka Meghalaya ki la wanrah bun tylli ki takma ksiar sha ïing. U bah Brian Wallang, u Manish Sohbar, u Stevenson Naduh, u Ian Kupar, bad ka Enifer Nongkynrih ki la khur mar kawei ka takma ksiar ha la ki jong ki jong ki kyrdan ïakop.
Ka Cathy Marbaniang ka la khur ïa ka takma rupa, ka Kathy Decruse ka la ïoh ban khur ïa ka takma rnong, bad ka Persara Thangkhiew bad ka Kynjaimon Pdah ki la pyndap sa ar tylli ki takma rupa ha ka jingkheiñ.
Ha kiwei pat ki jingïakop, ka Sonia Langstieh ka la ïoh ban khur ïa ka takma ksiar ha ka 12-Minute Military Snatch event, katba u Gagandeep Singh u la khur takma ksiar ha ka 10-Minute Snatch.
Kaba la nang pyndap shuh ïa ka jingjop kaba khraw jong ka jylla ka long ba u coach jong ki u Sandeep Sharma u la khur ar tylli ki takma ksiar ha ka jingïakob 10-Minute 24kg Snatch bad ha ka 30-Minute 24kg Snatch. Kane ka jinglehkai kaba kham kyrpang jong u, ka la pynlong ïa u ban ïoh rung sha ka lympung ïalehkai Kettlebell World Championship, kaban sa long ha Busto Arsizio, Italy, naduh ka 05 haduh 08 tarik u Jylliew.
Lah ban kdew ba u Coach Sandeep Sharma mynshwa u la jop ïa ka takma rnong na ka bynta ka India ha ka lympung ïalehkai Kettlebell World Championship ha Hungary ha u snem 2023 bad u la pynbud biang ïa kane ka jingjop ha Poland ha u snem 2024.
