Nongstoiñ, Rymphang 13: U Bah K.P.Pangñiang President ka Hill State People Democratic Party u ba dei ruh u kyrtong jong ka 32 Rambrai Jyrngam Constituency, mynta ka sngi ka lah sngi u Blei, u lum ïa ka jingïalang jong ki hynñiew tylli ki polling station kiba hap ha ka Rambrai zone, na ka bynta ban pynshai ïa ki mat treikam jong ka party ha shuwa ba ka sngi thep vote.
La pynlong ?a ka jing?alang ha madan jong ka St John Bosco Secondary School ha Nongkroh Rambrai, ha kaba la pyn?aid da u bah R.G.Nongsiej u ba dei ruh u secretary jong ka Rambrai zone, ha kaba la ïa don lang ruh da u sordar jong ka shnong Nongkroh ki sordar jong kiwei pat ki shnong bad ki nongkitkam jong ka party na ka ri Muliang zone, lem bad kiwei pat ki nongïalam ba hakhmat jong ka party ba kynthup ïa u bah Kotbor Warjri, u bah B.Syiemlieh, ki paitbah ba kynthup naduh ki longkmie ki bad ki samla jong ka Rambrai area.
Shuwa ban sdang ïa ka jingïalang u bah Pangñiang u la pyllait paitbah ïa ka manifesto kaba la thoh ïa ki 28 tylli ki mat ïaleh election, khnang ba ki paitbah kin pule bad kin pyrkhat shuwa ban poi ka sngi thep vote. Ha kajuh ka por u la pyllait ruh ïa ki poster ki jong u bad ka party .
U bah Pangñiang haba ai jingkren ha kane ka sngi u la ong ba ka jingialeh biang ka jong u ha kane ka election kaba myntam ka dei namar ba ki dang don shibun bah ki kam kiba um pat lah ban pyndep ha ki snem ba la lah. Nalor kata u la ong ruh ba ha kane ka kynti, lada ki paitbah kin ai ka jingkyrshan ban pynjop ïa u, ka thong kaba u don ka long ban pynlong ïa ka Rambrai ka constituency kaba phyrnai.
Nalorkata u la ong ruh ba ha kine ki snem ba u la shah jied kum u nongmihkhmat na ka Constituency, u la pyrshang katba lah ban trei shitom na ka bynta ban wanrah ïa ki kam pynroi hapoh ka constituency ha kaba u la pynkynmaw ruh ba ka jingïoh ïa ka surok National Highway na Nongstoiñ-Rambrai haduh Kyrshai, ka dei kaba u la trei shitom.
Hynrei dei tang na ka daw ba ka don ki jingpynthut hangne hangtai ba ka jingpyntrei ïa katei ka surok ka la sahkut, hynrei ha u snem 2017 ka sorkar pdeng ka la mang pisa bad ka la khot Tender ban pyntrei ïa katei ka surok. U la ong ba kaba lyngngoh ka long ba katei ka surok kam shym la poi haduh Kyrshai, hynrei ka kut noh tang ha ka shnong Mawlong hajan ka shnong Mawthir.
U la ong ruh ba lada un jop biang ha kane ka kynti, un ïakhun kat ba lah ban dawa na ka sorkar ba ka dei ban pynpoi noh ïa katei ka surok shaduh Kyrshai, namar lada ka surok ka la poi haduh Kyrshai, ka Brahmaputra Board kaba thmu ban den ïa ka Wahkhri ban pynmih bording, kan ym ïoh lad shuh bad na ka liang jong u kum u nongïalam ka HSPDP bad ka party baroh kawei, ka ïeng skhem ban pyrshah ïa ka Brahmputra Board ba kan den ïa ka wah Khri.
Ha kajuh ka por u bah Pangñiang u la pynkynmaw ruh ha kaba ïadei bad ka C&RD Block ha u snem 2013, ka la don ka proposal ban don noh ka Block ha Rambrai ha kaba uwei na ki trai khyndew u la ai sngewbha ïa ka jaka ban shna ïa ka Block Office, ha kaba ma u ryngkat ki heh sorkar ki la leit ban jurip bad ki la pynbit pynbiang ïa ki jingdonkam baroh.
Hynrei ym lah ban tip na kaei ka daw ba ka sorkar ka pynslem. Hynrei ha kane ka kynti la shu ai ïa ka Block khlem sngewthuh sngewthaw, ha kaba wat tang ki nongtrei ruh ym don bad ki paitbah kiba donkam ban leit sha Block ophis ki dang hap ban leit sha Nongstoiñ haba ki donkam.
U sordar shnong jong ka Nongkroh u bah B.Syiemlieh haba kren ha kane ka sngi, u la pynkynmaw ba lai bnai mynshuwa u Myntri Rangbah u la wan hiar da ka Helicopter ha katei ka madan bad u la sam sha ki paitbah da ki sniang. Hynrei kaba sngewsih ka long ba tang hadien shi sngi ar sngi, bun bah ki sniang ki la ïap bad mynta pat ka sur na ki nongïalam jong ka NPP, ka long ba kin thied ïa ki paitbah nongthep vote jong ka thaiñ Rambrai tang kat ka dor jong ka khlieh sniang. Kumta u la kyntu ïa ki paitbah ba kim dei ban die tad ïa ka longrynïeng ka jong ki, namar lada ki bakla sa ha kane ka kynti kin sa babe ar shah.
