Jowai, Rymphang 09: Ki paid riewngeit na ki Balang bapher bapher hapoh ka Jowai Presbytery kila wan tuid sha ka ‘Jingïaseng Jowai Presbytery’ kaba Shiphew (X) haka Balang Presbyterian Mynthong, Jowai kaba la sdang naduh ka 7 tarik haduh mynta ka sngi U Blei 9 tarik u Rymphang 2025 ha Madan Jrisaleiñ. Ka phang jong kane ka Jingïaseng kaba ong “Uei uba lah ban pynbeit ïa kata kaba ula pyndor” (Eklesiatis 7:13.
Ha ka Jingïaseng por 10 baje mynstep la don ka jingsam ïa ki khusnam sha kiba nongjop haka jingïakhun Examination jong ka Sunday School haki kyrdan bapher bapaher. Katba ïa ka khubor na ka ktien U Blei la sam da u TBn. Dr. B. Plain uba la pynshong nongrim naka shithi sha ki Ephesos 5:18, uba la pynsngew shaphang ka jingkhot U Blei ban long kiba la dap da u Mynsiem haka jingim.
Shuh shuh u TBn ula buh ka jingkyntu kum ki khun Khristan ki dei ban dap da u mynsiem jong U Blei, khnang ba kin long ki nongphla ïa ka kyrteng jong U. Ha ka juh ka por u khot ïa ki para bangeit ba kin pynkhuid shawa ïa ka dohnud halade, khnang ba u mynsiem U Blei un ïoh jaka ban shong ha ka jingim. Da kaba u kyntu ba ka pateng mynta ka dei ka pateng jong ka juk kumta kum ki khun Khristan ki dei ban long kiba stad.
Katba haka Jingïaseng paidbah por 1 shiteng nohphai sngi la sam ïa ka khubor naka ktien u Blei da u Rev. K. Jitem uba la pynshong nongrim na ka shithi kaba nyngkong u Apostol sha ki Nong korinth 2:2 kaba kren shaphang ‘U Jisu uba la sah Narphna’.
U don lai tylli ki mat ban ïa puson kaba nyngkong, uei une u Jisi Khrist? uba u Paul u kren hadien ka jingkylla bamut jong u kuj u Saul haka lynti sha Damaskot, ula shim noh ïa ka kam ïalap sha ki jait bynriew baroh shaphang u Jisu uba long u khun U Blei uba la siewspah ïa ki nongpop halor ka Diengphna.
Kaba ar, Balei la sah narphna ïa u Jisi Khrist?, da kaba u ong kane ka jingsah narphna ïa u Jisu ka long ban pynpaw sha ka pyrthei ïa ka jingshyrkhei jong ka pop bad ïa kine ki pop la sait khuid da u Jisu halor ka diengphna na ka bynta ki briew bad kane ka pynpaw ïa ka jingieit jong u Blei lyngba u Jisu Khrist.
Kaba lai, kumno ngin leh na ka bynta u Jisu?, da kaba u pastor ula pynkymmaw ïa uwei u dakait uba la khot kyrpad ïa u Jisu ban kynmaw lem ïa u ha paradise, namar u Jisu u long shisha uta ka lynti sha ka jingim kaba thymmai, la pynkut u Pastor.
Ha kane ka Jingïaseng la pynkup burom ruh ïa ki ar ngut ki Tymmen Basan hapoh ka Presbytery kiba la dap 25 snem ka jingshakri ha kane ka kam, kiba kynthup ïa u TBn. B.N Lamare bad TBn. M. Pakem.
La pynrhem shuh shuh ïa kane ka Jingïaseng da ki jingrwai na ki Choir ha ka Jingïaseng por 10 baje mynstep ki kynthup ïa ka Jingïaseng Samla Balang Presbyterian Shkenpyrsit, Jingïaseng Samla Balang Presbyterian Muphlang bad ka Jingïaseng Balang Presbyterian Ladthadlaboh, katba ha ka por 1 baje shiteng nohphai sngi ki kynthup ïa kaJ/S Balang Presbyterian Pynthor Langteiñ, ka Standing Choir J/S Jowai Presbytery bad ka Jingïaseng Samla Balang Presbyterian Mynthong.
Ha kane ka Jingïaseng da ki hajar ngut ki paid riewngeit jong ka Presbytery kila wan tuid ban shah skhor ïa ka ktien u Blei, ïa kane ka Jingïaseng yn pynkut ha ka por janmiet halor ka Subject Balang kaba ong “To phin ïa don mluh ha lade lade”.
La pyntip ka Jingïaseng Presbytery kaba Khadwei (XI) kan long haka District Mustem Balang Presbyterian Moopyut ha ki tarik 6-8 February, 2026 kaba ong “to pynkhlain phi ïa ki kti ba tolt bad to pynskhem ïa ki khosiew kiba la sator” (Isaiah 35:3).
Kum ka jingïatip baka Jingïaseng Samla KJP Synod Mihngi mynta u snem kan long haka Balang Presbyterian Sutnga haki tarik 13-16 March, 2025.
