Ki Bill ba pass na KHADC mynshwa ki jah lynti, mynta bun ki long aiñ ba shimkhia u Dy. CM

Shillong, Rymphang 09 : U MLA ka Sohra ba dei ruh u President jong ka NPP East Khasi Hills, Bah Gavin Mylliem ha ka sngi Saitjaiñ u la ong ba mynshwa ïa ki Bill (aiñ rew) ba pass na KHADC ki shu jah ha lynti khlem poi shaei shaei ruh.
“Hynrei dei ynda la wan ka Executive Committee ba ïalam da Bah Pynïaid ba la lah ban pynlong aiñ ïa bun ki Bill bad kane hi ka pyni ba ngi don ka thong ban ai ka jingshakri kaba paka ïa ka ri bad ka Jaidbynriew,” u la ong.
Ïa kane, u Bah Gavin u la kren ha ka jingïalang ïalap elekshon na bynta u kyrtong ka party na Langkyrdem – Laitkroh, Bah Rahbok Tynsong kaba long ha Nongkynrih ha ka janmiet sngi Saitjaiñ.
“Mynshwa bun tylli ki Bill ba mynjur ha KHADC ki la jah noh ha lynti hynrei dei da ka jingshimkhïa jong ka tnad District Council Affairs hapoh ka jingïalam jong i Bah Prestone Tynsong kum u Symbud Myntri Rangbah ba la thaw da ka komiti kyrpang ban peit bniah bad kumta tang hadien khyndiat por la lah ban pynlong ïa kiba bun tylli ki Bill ba phah da ka KHADC,” u la ong.
U Bah Gavin u la ong ruh ba ym don ba lah ban len ba ka sorkar MDA hapoh ka jingïalam jong ka NPP ka la leh shibun ki kam na bynta ka jingmyntoi bad ka bha ka miat jong ki paidbah nongshong shnong.
U la kdew ruh ba ka ishu pynbeit pud kadei ka mat kaba la shu ieh kumto naduh ba ïoh ïa la ka jong ka jylla ha u snem 1972 hynrei dei ka sorkar ba ïalam da ka NPP kaba la raikut bad sdang ban pynbeit bad kumta hynriew tylli ki jaka kajia pud la dep ban pynbeit hapdeng ka sorkar Meghalaya bad ka sorkar Assam ryngkat ka sorkar India,
U ong ruh ba hapdeng ka jingshah kynthoh na ka liang pyrshah hynrei kim shym la pynsngap pynban ki ïaid beit shakhmat ban pyndep ïa ka kamram.
Nangta u ong ruh ba dei kane ka sorkar kaba la sdang ban shim ïa ka sienjam ban phah pyndap lut ïa ki kam nonghikai kiba da ki hajar ngut kiba la shu shong thylli bad thung da ki nonghikai ba shipor. U ong ruh ba hapoh kane ka sorkar MDA ba la lah ruh ban phah shna thymmai bad maramot ïa baroh ki skul sorkar kynthup ïa ka skul kaba don hangtei ha Nongkynrih.
“Ha ka liang ki surok kali lei baroh ki 59 ngut ki MLA ki la ai ka jingïaroh ïa u Symbud Myntri Rangbah ba dei peit ïa ka tnad PWD Bah Prestone Tynsong,” bynrap biang u Bah Gavin.
Shwa kane, une u MLA u la ïathuh ba ha shwa u snem 2018 ki don da ki phew tylli ki shnong ha Sohra constituency ki bym pat poi surok bad ki bym ju phohsniew ban ïoh surok. Hynrei u la ïathuh pat ba na kine ki 42 tylli mynta 13 tylli ki la ïoh surok bad ka jingtrei ka la ïaid shakhmat watla ki dang don sa katto katne kiba ym pat ïoh surok. Nangta u la ong ba wat ïa ki surok kiba la jot rathai dei kane ka sorkar kaba phah maramot thymmai.
Haba pynshai halor ka jingshah kynthoh ba u leit ban pynïasoh sha ka NPP, u Bah Gavin u la ong ba shwa ba un shim ïa kane ka sienjam u la da bishar bniah bad rai sani da kaba buh shwa ïa ka jingdonkam ki paidbah ka constituency ha khmat.
“Ngi mad ïa ki jingkynthoh kiba bun hynrei kum u nongmihkhmat nga long uba kloi ban long u dieng shaiñdoh na bynta ka jingmyntoi ki paidbah ka constituency,” u la ong.
Shuh shuh u ong ruh ba kan myntoi aiu ban long nongmihkhmat haba ynda la wan ki Nongïalam Shnong, ki skul bad ki kynhun balang bapher bapher ban pan jingïarap hynrei ym lah ban leh ei ei bad sa shu ai daw ba ym don ha ka bor.
“Ban shu ieid ri bad ieid jaidbynriew tang da ka ktien nga sngew long lehnohei ka jinglong nongmihkhmat,” u la bynrap biang da kaba ong ba dei kane kaba pynlong ïa u ban shim ïa katei ka rai ban pynïasoh noh sha ka NPP ha u 2023.