Shillong, Risaw 14: Ka tnad Arts and Culture jong ka sorkar Meghalaya, ka la pynlong ïa ka Tri Hills Ensemble kaba dei ka lympung ban pynpaw pyrthei ïa ki jingbam tynrai jong ka jylla Meghalaya.
Ki nongshet jingbam tynrai na kylleng kylleng ki jaka jong ka jylla kum na Sohra, Amlarem, Garo Hills, Jaiñtia Hills bad kiwei kiwei de ki jaka ban wanrah bad shet ïa ki jingbam kum ka jadoh, doh khleh, tung rymbai, dohkha syang ne kharang, nang ka tham, nalor ki jait soh kum u sohphlang bad u nei bad kiwei kiwei. Ha kane ka jingïalum lang, la buh ruh ïa ka jaka ban die ïa ki tiar kiba ki paidbah ki ju die ha ïewduh, kum u sohmynken, ki wait ki moh khiew, ki jhur, ki achar, ki umsoh bad kiwei kiwei.
La ïohi ba da ki spah ngut ki paidbah ki la ïatuid ban leit mad bad bam ïa ki jingbam tynrai ha kane ka lympung bad bun ruh kiba song bad rah sha ïing.
Ïa kane ka lympung jingbam na ki lum, la plie da u Myntri Rangbah ka jylla, u Conrad Sangma, ha kaba la ïadon lang ruh u Bah Sanbor Shullai, Myntri ka tnad Arts and Culture bad kiwei kiwei de ki heh sorkar.
Ha kane kajuh ka sngi la plie ïa ki motdur jong u Tirot Sing Syiem, u Kiang Nangbah bad u Pa Tongan Sangma, ba la tei ha jaka ba don u mot laidong jong kine ki nongïaleh laitluid ka ri.
Haba kren ha kane ka jingplie ïa kane ka lympung kaba arsngi, u Myntri Rangbah, u la ong ba ki lympung kiba kum kine, kin ïarap ban pynkynmaw ïa ka tynrai kaba ki briew kane ka jylla ki don. Ha kajuh ka por, ula ong ruh kane kan ïarap ïa ki samla ban kynmaw ïa la ka tynrai.
Ha kane ka jingïalang ka sorkar ka la ai khusnam ruh ïa ki shnong kiba la trei shiton ban pynneh pynsah ïa ki jingtrei tynrai da ka kti. Kine ki shnong ki long ka Mawryngkhang, East Khasi Hills, kaba dei ka shnong ba pynim bad pynneh pynsah ïa ki jingtem tiar tynrai, nangta ka Larnai ha West Jaiñtia Hills kaba la pynneh pynsah ïa ka jingshna khiew khyndew, ka Pahambir, Ri Bhoi District kaba pynneh pynsah ïa ki sur bad jingshad tynrai, ka Tangmang, East Khasi Hills kaba pynneh pynsah ïa ka jingthaiñ skhen, ka Mairang, Eastern West Khasi Hills kum ka District kaba pynneh ïa kiei kiei kiba dei ki tynrai la jong bad ka Amindagre, West Garo Hills, ka jaka ba pynneh pynsah ïa ka jingshna dur da ki dieng.
