Khot ïakren ka Management ïa ka MePWU

0

Shillong, Risaw, 14: Ki bor pynïaid jong ka Meghalaya Energy Corporation Limited (MeECL) ki la khot sha ka miej jingïakren ïa ki nongïalam jong ka MeECL Progressive Workers’ Union (MePWU) ha ka Lah Sngi U Blei jong ka taïew ban sa wan.
“Ka Management jong ka Meghalaya Energy Corporation Limited ka la khot ïakren ïa ngi ha ka 17 tarik mynta u bnai ha ka por 11.30 baje mynstesp,” ong u President ka Union u Bah Mantiphrang L. Kiri.
Ka MePWU kaba dei ka Union jong ki nongtrei Contractual/Casual ka la dawa na ka Management ban thaw ïa ki polisi na ka bynta ban pynskhem pura ïa ki nongtrei casual kiba la trei la slem hapoh ka MeECL.
“Hynrei na ka daw ka jingkuman jong ki bor bahalor ka MeECL ban khot ïakren ïa ki nongïalam jong ka Union, ka Union kam don lad shuh da kumwei pat hynrei ka la hap ban pynlong da ka jingïakhih ha ka wat kaba nyngkong naduh ka 29 tarik, 30 tarik bad 31 tarik, Nailar mynta u snem da kaba deng lama iong ha baorh ki ophis treikam bad ban pynlong da ka jingïashong kyllaiñ mynngor naduh ka 5 tarik haduh ka 16 tarik, Nailur ha phyllaw jong ka MeECL, Lumjingshai, Shillong,” la ïathuh u Bah Kiri.
Ka jingïakhih ha ka wat kaba ar ka la long da ka jingïakhih ha ki kynta bamja sngi, kata naduh ka por 1:30 baje noh sngi haduh 2:00 baje nohsngi naduh ka 10 tarik haduh ka 14 tarik mynta u bnai ha B.C House, Shillong ha kaba yn sa pynbut pad da ka Mass Casual Leave ha ka 17.10.22 khnang ba ki dkhot ka Union kin dup ïohlad ban ïashim bynta ha ka rally ka ban long ha Parling lot, MeECL, Lumjingshai, Shillong.
“Ïa ka jingïaid proseshon sha Secretariat yn sa rai hadien ba la wai ka jingïalang bad ka Management,” ong u Bah Kiri.

Leave A Reply

Your email address will not be published.