36 na wei ki MLA na Rilum Khasi kiba donkam ban pynrem ha u 2023: HNYM

Shillong, Risaw 14: U President ka Hynñiewtrep National Youth Movement (HNYM) u Bah Louis Dohtdong u la ong ba namar ka jingjied ïa ki nongmih khmat sha ka ïing dorbar thaw aiñ ka jylla ka la jan na ka liang ka seng kan pynkhreh ïa ki mat kiban pynsngewthuh paidbah ïa ka jingdonkam ban pynrem noh ïa ki 35 ngut napdeng ki 36 ngut ki MLA namar kim shym la kren eiei na bynta ka jingmyntoi jong ka jaidbynriew.
“Phi la ïohi ba 35 na ki MLA jong ngi kim ju kren ne leh eiei kaba pynmyntoi na bynta ka jaidbynriew hynrei don tang uwei uba leh ïa kata hynrei um ju ïoh jingkyrshan eiei bad ngam donkam hi ruh ban jer kyrteng mano uta namar baroh ngi la sakhi da la ki khmat na kata ka daw ngi donkam ban trei shitom na bynta ban pynrem lut noh ïa kine ki 35 ngut” ong u Bah Louis ha ka jingkren ha ka jingïalang lyngkot ba la pynlong da ka HITO ha shuwa ba kan sdang ïa ka jingïaid paidbah ban leit buh syntiew ba ka la pynlong ha ka sngi Thohdieng.
U Bah Louis u la ther tyngeh ruh ïa ka sorkar namar ka jingleh tohmet jong ka ïa ki nonghikai kiba la tur sha Srecretariat ha ka 6 tarik bad ong, “balei ka sorkar lyngba ki pulit ka thom bor ïa ki nonghikai ba tlot lada ka kop wan bad ngi ki nongïalam seng bhalang namar ngim lah shah ïa ka jingleh jong pha.”