Tuid ki jingsngewlem na u Myntri Rangbah, ki Myntri, Congress bad BJP ba khlad u Pope

By Mawphor Editor On Apr 22, 2025

Shillong, Ïaiong 21 : U Myntri Rangbah ka Jylla Conrad K Sangma kumjuh ka Myntri ka Koit ka Khiah ka jylla, Dr. M Ampareen Lyngdoh ha ka sngi Nyngkong ki la phah ka jingsngewlem halor ka jingkhlad noh u Pope Francis da kaba ong ruh ba u dei u Pope jong ki paidbah.
Ha ka kyrwoh sngewlem sha u Apostolic Nuncio sha India, u Archbishop Leopoldo Girelli, u Myntri Rangbah u la ong, “Nga dap da ka jingsngewsih halor ka jingkhlad noh u Pope Francis, u shakri ba shisha jong u Blei uba la lah shisha ban ktah ïa ka pyrthei baroh kawei.”
Nangta u ong ruh ba na ka liang jong u bad ki paidbah ka Meghalaya, ki phah ka jingsngew burom sha u Pope Francis namar ka jingshakri kaba janai bad kaba pynsah jingkynmaw.
Ha kajuh ka por na ka liang ka Myntri pat haba kren bad ki lad pathai khubor ka la ong, “Nga dap da ka jingsngewsih bad ka jingduh kaba khraw haba ka Vatican ka pyntip ïa ka jingkhlad noh jong u Pope Francis. Baroh ngi ïam briew halor ka jingduhnoh ïa u.”
Ka Myntri ka ong ruh ba u Pope Francis u dei ruh u paralok jong ki samla bad u pynleit jingmut ruh ha ka jingshim bynta jong ka Balang ha ki kam kiba ïadei lang bad ka pyrthei shi tyllup. “U la dap 88 snem hynrei hapdeng ka jingshitom ba u kynduh ha ki khyndiat bnai, ngi ki paidriewngeit Katholik ngi la nang khmih lynti ba un dang ïai lah ban bteng kum u nongïalam jong ka Balang Katholik,” ka la ong.
Ha kajuh ka por ka BJP Meghalaya ruh lyngba u President jong ka, u Rikman G Momin ki la phah lang ïa ka khubor sngewlem halor ka jingkhlad noh jong une u nongïalam ba hakhlieh duh jong ka Balang Katholik ha ka pyrthei.
“Na ka liang ka State BJP ngi phah ka jingsngewlem halor ka jingkhlad noh jong u Pope Francis da kaba snohkti lang bad ka Balang bad kumjuh bad ki paidbah ka jylla kiba bun ki dei ki khristan, ha kum kane ka jingjia ba sngewsih,” ong ka kyrwoh ba la phah da u President ka BJP.
Na ka liang ka Meghalaya Pradesh Mahila Congress lyngba ka President Kong Joplyn Scott Shylla ka phah lang ka jingsngewlem halor ka jingkhlad noh jong u Pope Francis da kaba ong ba u dei u nongïalam uba don ka mynsiem ieid parabriew bad ka jingshitrhem ban shakri ïa ka imlang sahlang.
“Ka Mahila Congress pynpaw ka jingsngewlem sha ka Balang Katholik bad sha ki paidbah ka pyrthei hi baroh kawei, ngin kynmaw bad burom ïa u Pope Francis da ka jingieid,” ong ka kyrwoh na ka President Mahila Congress.