U long u briew uba aiti lut met ban mynsiem ban shakri ïa ka Balang bad para briew : Ma Sniawbhalang

Shillong, Iaiong 21 : Kum u Symbud Myntri Rangbah ka Jylla bad ruh kum u MLA jong ka Nartiang Constituency, u Ma Sniawbhalang Dhar u ïasnohkti lang bad ki paidriewngeit jong ka Balang Katholik ha ka jylla ban sngewlem halor ka jingkhlad noh u Pope Francis ha ka step 21tarik u Iaiong.
“ Ha kum kane ka por ba ka pyrthei ka duh noh ia uwei na ki nongialam ba khraw bad uba shemphang, ryngkat bad ki paidbah ka jylla baroh kawei nga phah ruh ïa kane ka jingsngewlem lyngba ki nongïalam jong ka Balang ha ka jylla” ong u ma Sniawbha.
“ Kum u nongmihkhmat paidbah nga la ju ïohsngew bad ïoh ruh ka lad ban tip bun bha shaphang u Pope Francis bad ki kam ba khraw kiba u la leh na ka bynta ka jingsuk ha ka pyrthei. Kaba shoh eh ïa ka mynsiem jongnga kum u briew ka dei ka jingkloi jong u kum u Khliehduh jong ka Balang Katholik ban ïasaid, ban kren bad ban trei na ka bynta ki duk ki suk, kiba shah nion beiñ, ki poiwir bad bun kiwei kiwei” ong biang une u Nongialam.
“ Kumta ha kum kane ka khyllipmat, nga shim biang ïa kane ka lad ban kynmaw burom bad ai ka burom na ka bynta ka jingaiti lut jong u ban shakri met bad mynsiem na ka bynta ka Balang bad ruh na ka bynta u paid bynriew ha shi tyllup jong ka pyrthei” pynkut u Symbud Myntri Rangbah ka jylla.