Shillong, Ïaiong 21 : Ka Jyllaniam-bah Shillong kan pynlong da ka Mass Bakhuid ha ka 22tarik janmiet na ka bynta u Kpa Bakhuid Pope Francis uba la khlad noh ha ka step jong ka 21tarik mynta u bnai.
Ha ka jingpyntip sha ki Lyngdoh, ki Riewniam bad ki paidriewngeit jong ka Jyllaniam-bah, u Archbishop ka Archdiocese, Most. Rev. Victor Lyngdoh u la ong, “Kan don ka Mass Bakhuid na ka bynta u Kpa Bakhuid ha ka sngi Ba-ar, ka 22tarik Ïaiong 2025 ha ka por 5:30 baje janmiet ha Ïingmane bah. Ngi kyrpad ïa baroh ki Lyngdoh, ki Riewniam bad ki paid-riewngeit ban wan shim bynta ha ka Mass Bakhuid bad ban duwai ba u Blei ka jingisynei Un ai ka jingjahthait bymjukut ïa u Kpa Bakhuid. Ngi buh ïa ka Balang ha ka jingïada jong ka Kmie Bneng jongngi, ha kum kane ka por jingsngewsih.”
Shwa kane, u Archbishop u la ong ruh ba ki dap da ka jingsngewkhia mynsiem ban pyntip ïa ka jingkhlad noh jong u Kpa Bakhuid u Pope Francis. “Ka jingkhlad jong u ka dei ka jingduh ba khraw ïa ka Balang bad ïa ka pyrthei baroh kawei.”
Nangta la ong ruh ba u Pope Francis u long u Nongsharai ba radbah jong ki paidriewngeit uba la ieng na ka bynta kiba duk bad kiba shem lanot. “Kum u Nongïalam jong ka Balang bad u Nongmih bujli jong u Petrus Bakhuid, u la ïalam ïa ka Balang da ka jingstad Blei, ka jingieid kpa, ka jingsngewrit bad ka jingkylluid mynsiem, da kaba wanrah ïa ka jingïalong kawei bad ka jingbha jingmiat hapdeng ki briew baroh. Ka jingieid jong u ïa kiba duk bad kiba shah lehbein, kum ki nongphetwir, ka la wanrah ïa ka jingithuh satlak pyrthei. Ka jingieid jong u ïa ka Mei Mariang ka paw khamtam lyngba ka shithi sharai jong u, ka ‘Laudato Si’, kaba la wanrah ïa ka jingkhih jingmut ha baroh ka pyrthei. U Snem Jubili jong ka jingkyrmen ba la pynbna da u, bad uba dang ïaid mynta, ka la ai mynsiem ïa kiba bun ban phai sha ka jingieid ba isynei jong u Blei,” bynrap ka shithi na u Archbishop sha ki Lyngdoh, ki Riewniam bad ki paid-riewngeit jong ka Jyllaniam-bah Shilong.
