Tuid da ki phew hajar ngut ki paidbah sha ka Shillong Literary Festival ha Nan Polok

Shillong, Naiwieng, 20: Da ki phew hajar ngut ki paidbah ki la tuid sha Nan Polok ban ïa shim bynta ha ka Shillong Literary Festival lane ka rong ka taw jong ka thoh ka tar kaba la neh haduh lai sngi kynthih.
Ïa kane ka tamasa la plie paidbah da u Myntri Rangbah ka jylla u Conrad K Sangma ha ka lah sngi u Blei bad la pynhap pyrda pat ha ka sngi Balang da u Myntri ka tnat Tourism u Bah Paul Lyngdoh ha ryngkat ka jingdonlang jong u Ambassador ka ri Turkey u Firat Sunel.
Ha kane ka sngi pynkut, baroh shisngi ka la don ka jingïaphylliew jingmut hapdeng ki nongthoh kot bad ki riew shemphang na kane ka jylla ba kynthup ïa u Dr.Desmond Kharmawphlang, ka Dr.Janet Dkhar, u Nocholas Kharkongor, ka Samanda Nora Pyngrope bad kiwei pat. Ha ka por janmiet pat la pynjah thait ïa ki paidbah da ki sur jingrwai jong ka Mamma Mia ba ka kynhun jong ka St.Edmunds School bad kiwei pat ki kynhun.
Ha kane ka rong ka taw kaba lai sngi ki nongthoh kot bad ki myllung ba paw jong ka ri India ki la wan poi sha ka nongbah Shillong naduh ka sngi kaba sdang haduh ban da pynkut.
Katto katne ngut na ki nongthohkot ba paw jong ka ri India kiba la wan poi sha kane ka tamsa ki kynthup ïa ka Shobha De, u Vikram Seth, u Jerry Pinto bad kiwei pat. Hangne la ïa donlang ruh ki nongthoh kot na kane ka jylla ba kynthup ïa u Bah Kynpham Sing Nongkynrih, ka Kong Amabel Susngi, u Bah Avner Pariat, nangta u nongdro ba paw u Dr. Benedict Skhemlang Hynñiewta, u Dr. Desmond Kharmawphlang nalor kiwei pat.
Ha kane ka tamasa ki samla pule khamtam kito kiba sngewtynnad ban thoh kot ki la ïohlad ban ïakren bad ban ïasyllok markhmat bad ban pan jingmut ruh na ki nongthoh kot khnang ba kin lah ban nang ïai pynjanai shuh shuh ha ka thoh ka tar. Hangne ki paidbah ki lah ruh ban thied ïa kiba bun jait ki kot ha ka ktien Khasi bad ktien Phareng ïa kaba la buh ha ki Stall bapher bapher.
Hadien ka jingïasyllok bad ka jingïaphylliew jingmut kaba baroh shisngi la pynjah thait ïa ki paidbah da ka jingput jingtem bad ka rwai ka siaw na ki kynhun bapher bapher ïa kaba la pynïaid lyngba ka Meghalaya Grassroots Music Project.
Kum ban shu pynkymaw hangne, ïa kane ka tamasa la plie pyrda da u Myntri Rangbah ka jylla u Conrad K. Sangma ha ryngkat ka jingdonlang u Myntri Sorkar uba khmih ïa ka tnat Jngohkai Pyrthei u Bah Paul Lyngdoh, u Commissioner and Secretary ka tnat Tourism u Dr. Vijay Kumar D, u Principal Secretary ka tnat Arts and Culture u Bah Fedrick Roy Kharkongor, u Director ka tnat Tourism u Bah Cyril V. Diengdoh bad kiwei pat kiba la shah khot sngewbha.
Haba kren ha kane ka sngi sdang u Myntri Rangbah u la ong ba kane ka tamasa kan ïarap ban ai jingmut ïa ki samla ym tang ha ka thoh ka tar hynrei ba kin ïohlad ruh ban pynpaw pyrthei ban pyntbit bad nang pynjanai ïa ka sap jong ki la ka long ha ka dro dur ne ha kiwei pat ki sap ba ki don.
U la ong ba ki ïoh ruh ïa ka lad ban sei ïa ka sap jong ki ha ka rwai ka siaw bad ka put ka tem ïa kaba ka sorkar ka thrang eh ban nang kyntiew shuh shuh ïa ki.