Treikam ka bor pisa ha ka elekshon Gambegre, kynnoh ka Congress

Shillong, Naiwieng 24: U nongïalam ka Congress u Bah Manuel Badwar u la ïathuh ba ka jingrem ka party hapoh ka elekshon shiteng samoi ha Gambegre ka long na kiba bun ki bynta kaba kynthup ïa ka jingpyndonkam da ka bor jong ka pisa.
U Bah Badwar u la ong ba na ka bynta ka National People’s Party (NPP), ka jingjop ha Garo Hills ha kane ka elekshon shiteng samoi ka long kaba kongsan.
“Ki la ïalehkai tyngeh, bad ka la don ruh ka jingpyndonkam ïa ka pisa, kaba kynthup ruh ïa ka jingpyndonkam ïa ki tiar jong ka sorkar bad ki scheme,” ong u Bah Badwar.
U Bah Badwar u la kdew ruh ba u Saleng Sangma, uba dang shu shah jied thymmai kum u Member of Parliament, um shym da la ïoh bha ka por ban pynleit jingmut ha ki sngi ba ïalap elekshon.
U la kdew ruh kumjuh ba ki daw ba ka kyrtong ka Trinamool Congress (TMC) ka la wan ha ka kyrdan kaba ar ka dei namar ba ka la ju ïakhun lah bunsien napoh ka Gambegre bad ka la don ïa ki nongkyrshan bad nalor ba ka dei ka kyrtong kaba khlaiñ.
U Bah Badwar u la kubur ruh ba ka jingduh ka seng Congress ïa ka Gambegre seat ka la ktah ïa ka seng. Ha kawei ka liang pat u la ong ba ki nongtrei ka party ha ka jylla ki dang long kiba khlaiñ bad bun ruh kiba la pynïasoh sha ka party. “Ngi donkam ban dang trei shitom shuh shuh ban pynkhie im biang ïa ka seng bad ban pynkhlaiï naduh ki shnong ki thaw,” u la ong.
U la pynkut da kaba ong ba ha ka saiñ pyrthei la ju mad beit ba kan don beit ka jingkiew jinghiar.