Tohkit bniah ki heh ka sorkar NDA halor ki jingjia Dei ban pynshitom ïa u Engineer,Contractor bad aiti tohkit sha ka CBI : BJP

Shillong, Jymmang 22 : Ka jingkhyllem jongka Dome ne u maw mot ba pyllung ha ka dur shynrong pylleng ba la tei halor ka tnum jong ka ïing dorbar Assembly ba thymmai ha Mawdiangdiang ka la long sa kawei ka jingjah burom bad jingkhlem raiñ ïa ka jylla ïa kaba la tih bniah mynta da ki heh ka sorkar NDA na Delhi bad halor kane ka BJP ha kane ka jylla ka dawa ba ka sorkar ka dei ban pynshitom ïa u Executive Engineer uba dei peit ïa ka jingtei bad ban pynsangeh noh ïa ka kompani kaba ïoh kontrak ban tei ïa kane ka ïing dorbar. Nalor kata la dawa ruh ban aiti tohkit ïa kane ka jingjia sha ka CBI.
Haba kren ha u nongthoh khubor u bah Ernest Mawrie President ka BJP ha kane ka jylla u la ong “ Kine ki jingjia kawei hadien kawei ha ka jylla naduh ka jingpei um ka tnum ISBT, ka jinghiar ka surok Mawlai By Pass bad mynta sa kane ka jingkhyllem kane ka Dome ka la buh da shisha ïa ka jylla ha ka khlem raiñ sat bad sngewjah burom haduh katta katta. ïa kane ka ïing dorbar thawaiñ ba thymmai la ioh kontrak da ka Rajkiya Nirman Nigam Ltd kaba na UP namar na ka jingmang ba 147 klur kane ka kompani ka thep tender tang 127 klur ka jingïapher ka long haduh 18 klur tyngka. Kumta haba la pynhiar dor haduh katne khlem pep kane ka kompani kan hap ban ïaleh ban tei torti ban ïoh nong namar kane ka kompani ka dei nabar jylla bad kam salia lada jia ei ei ruh kaba sngewsih hynrei donbok ba ha kane ka kynti ym shym la jia ei ei ka jingiap briew namar ba ka jia ha ka por 12.30 ei ei step synnia ka Sngi U Blei”.
U la ong shuh shuh “ ïa kane ka pisa ban shna Assembly la bei da ka sorkar pdeng bad dang shen u Lamphang ka ïing dorbar Lok Sabha u Om Prakash Birla u la kyntiew sa 100 klur tyngka ban pyndep ïa kane ka jingtei hynrei ka kam ym pat dep ka ïing dorbar ka la khyllem. Kumta kum u nongïalam ka BJP nga dawa ba dei ban pynshitom ia u Engineer ba dei peit u bah Ransom Sutnga, dei ban pynsangeh noh ïa kane ka kompani ban tei torti ïa kane ka ïing dorbar bad dei ban aiti tohkit sha ka CBI namar ka pisa ka wan na ka sorkar pdeng”.
U la ïathuh ha ka Tender ka la don ka kyndon kaba kdew shai ba lada ym tei kat kum ka plan ne lap ba trei torti dei ban pynshitom ïa ki engineer bad kompani ba ïoh kontrak ruh. Mynta ka sorkar ka dei ban thung da ka Committee ka ban jurip kyrpang la katei ka ïing dorbar ka don jingshngaiñ ne em ban ïashong dorbar namar kine ki dak ki shin ki paw ba la shu pyntrei torti ïa ka. Nalor kata u la ïathuh ba katei ka Rajkiya Nirman Nigam Ltd ka ai sub contract sa sha u Badri Rai & Company. Une u dei u juh u briew uba pyntrei ïa ka ïew ha Polo kat kum ka smart city, u dei une ruh uba pyntrei ïa ka Purno A Sangma Stadium, ïa ka surok na Resubelpara sha Mendipathar bad na Phulbari sha Rongram. Ka jingpyntrei jongu ka long kaba torti bha ong u bah Ernest.
“ Nga la leit busien sha Garo Hills naka bynta ka party bad nga ïohi ia ka rukom pyntrei jongu ïaki surok ka long kaba torti haduh katta katta. Ka sorkar ka dei ban blacklist ïa une u kontraktor bad ïa katei ka Rajkiya Nirman Nigam Ltd bad dei ruh ban pynsangeh ka jingai kontrak sha kiba shabar namar kine ki shu trei tang dep ïa ka kam tang ban ïoh kjit ïa ka pisa na kane ka jylla. Kum u President ngan sa ïa kynduh ia u Myntri Rangbah u Conrad K Sangma ban dawa ba ym dei shuh ban ai kam sha ki kompani kiba nabar ka jylla namar kine kim don jingbah khlieh lada jia kino kino ki jingjia ba sngewsih ruh. Kumta sa shisien nga dawa ba dei ban tohkit bad pynshitom naduh ki politician, engineer ba dei peit bad black list ïa ka kompani bad ha kajuh ka por dei ban aiti tohkit sha ka CBI halor kane ka kam khnang ban paw lut ki jingshisha baroh” pynkut u bah Mawrie.