To ngin ïatreilang ban ïakhun pyrshah drok ba ka Meghalaya kan ym long kum ka Punjab : Paul

Shillong, Jylliew 26: Ka Meghalaya ka don haka jingïakhun kaba jwat ban rat dyngkhong ïa u drok bad ïaka jingngop ki samla kaba buh ïa ka lawei jong ki ha ka jingma kumba la jia hapoh ka Jylla Punjab.
Haba kren haka sngi rakhe ïa ka sngi pyrshah drok lane ka “International Day against drug abuse and illicit trafficking” u Myntri ka tnat Social Welfare u Bah Paul Lyngdoh ula ong baka long kaba donkam eh ban ïasnohkti lang baroh ban ïakhun pyrshah khnang ba yn lah ban rat dyngkhong ïa u drok lym kumta ka lah ban pynlong ïaka Meghalaya kum ka Jylla Punjab.
U Bah Paul ula kubur ba ki don ka por baka Jylla Punjab ka pawnam bha haki kam ïalehkai bad kam ïada Ri hynrei mynta kane ka Jylla kala shah pynjot ha u drok bad pynjot ïa ka lawei ki khun samla.
Ula kyntu ïaki samla ka Jylla Meghalaya ban peit nuksa na kaei kaba la jia hapoh ka Jylla Punjab bad donkam ban shim ïa ki sienjam ba tyngeh ban ïada ïaka jingshah pynjot ka Jylla ha u drok,
U Myntri ula kubur ruh baka Meghalaya kam dei shuh tang ka Jylla kaba pynïaid lynti ïa u drok sha kiwei pat ki Jylla ka thaiñ shathei lam mihngi hynrei u drok ula rung lut sha man ki kyndong kynshrot jong ka Jylla.
Ula ïai ban baka long kaba donkam ban ïatreilang hapoh ka imlang sahlang ban ïakhun pyrshah ïa ka jingkyrni drok.
“Ka imlang sahlang hapoh ka Jylla Meghalaya kala sngewthuh ba donkam ban pynsted bad pynkhlaiñ ïaki sienjam haba ïadei bad ka jingtehlakam ïa ka jingwanpoi bad ka jingjyllei u drok hapoh ka Jylla namar mynta ka imlang sahlang kala sngewthuh ba ngi hap ban jop ne ngi hap ban kylla ki nongjot hakhmat u drok” la ong u Bah Paul.
U Bah Paul ula ong baka por kala kut ban ïa kdew kti markylliang, watla ki lah ban don ki jingduna hapoh ki Policy jong ka Sorkar ne haki rukom treikam ka social welfare hynrei baroh ki lah ban ai jingmut haba ïadei bad ka jingïakhun ban rat dyngkhong ïa u drok.