Phah tohkit u DC, Rejister case ka MSWC,pan kaiphod ka Assembly Committee

Halor ka jingshah shoh shah kynjat dusmon ka kynthei ha Garo

0

Shillong, Jylliew 26 : Ki bor jongka aiñ ki la shim khia bha halor ka jingjia kaba i sangsot ïa kawei ka kynthei briew ha ri lum Garo ha kaba ki riew rangbah ki la shoh, sympat bad kynjat ïa ka hakhmat ki paidbah. Na ka liang u Deputy Commissioner (DC) ka West Garo Hills u Jagdish Chelani u la phah tohkit halor ka jingjia, Ka Meghalaya State Commission for Women ruh ka la rejister case halor kane ka jingjia bad kumjuh ruh ka Assembly Committee on Women Empowerment ruh ka la pan kaiphod halor kane kajuh ka jingjia.
U Deputy Commissioner ka West Garo Hills Jagdish Chelani, ula hukum ban pynlong ïa ka jingtohkit halor ka video ba pyni ïa ka jingshah bom shah tied ka samla kynthei kaba isangsot haduh katta katta ha Lower Teksragre, Damal Asim, West Garo Hills.
Ki Pulit ki la sdang ïa ka jingtohkit halor kane ka jingjia, kaba jia ha kawei ka Shnong jong ka West Garo Hills. Ha ka video la ïohi ba ki shynrang jong kane ka Shnong kila shoh naphang ïa kane ka kynthei, patan jubor ïa ka na u sniuh bad bom da ki siej kat naba lap, khlem ka jingisynei wat hapdeng ka jingiam bad jingkyrpad na kane ka samla ba kin sangeh.
Kane ka jinglong riewkhlaw ki briew kala paw haba wat ki kynthei jong ka Shnong kiba sakhi ïa kane ka jingjia, ki la aiding bad pynshlur ïa ki shynrang ba kin shoh kin bom ïa kane ka kynthei.
Tang uwei u riew rangbah ula ïeng bad pyrshang ban pynsangeh ïa kine ki nongshoh hynrei ula shah khynniat pynban khlem ka jingpyrwa eiei ruh em.
Kum kine ki jingjia ki kham niar ban jia ha kane ka juk mynta lait noh tang ha ki Ri kiba synshar ki lehnoh kum ka Afghanistan bad Pakistan kiba ju pynïaid ïa ki kashari kangaroo bad ai ka jingpynsajia ba tohmet bha wat ïa i kam bymman iba rit duh kum ka kam tuh kam thiem bad kiwei kiwei.
Ka Meghalaya State Commission for Women (MSCW) kala shim suo moto case halor ka jingshah shoh tohmet kawei ka kynthei ha katei shnong ka West Garo Hills District.
Ka kyrwoh bala pyllait hynne ka sngi Balang ka ong ba ka Commission kala pynrem jur ia kane ka jingshoh tohmet ïa kane ka kynthei ha ka shnong Teksragre .
“Ka Commission ka la shim ïa ka suo moto case halor kane ka jingjia bad hynne ka janmiet, ka Vice Chairperson ka MSCW bad ki dkhot, kila ïakynduh ïa u Superintendent of Police, West Garo Hills ban tohkit bniah bha ïa kane ka jingjia bad ula pyntip ïa ka Commission ba ki Pulit kila dep kem ïa ki briew ba donkti” kala ong.
Ka Commission kan sa leit ïakynduh ïa kane ka lanot bad kan sa nang buddien ban shim rai ïa kaei kaba dei ban leh.
Ka video kaba la saphriang paidbah, ka pyni ïa ki shynrang jong kane ka shnong kila bom naphang ïa kane ka kynthei da u siej bad patrong ïa u sniuh wat hapdeng ka jingiam, lyniar bad jingkyrpad ïa ki ba kin sangeh.
Ka Meghalaya Assembly Committee on Women Empowerment kala pan ïa ka kaiphod ba kyrkieh na u Superintendent of Police ka West Garo Hills, Abraham T Sangma, halor ka jingshah shoh tohmet ka Kynthei ha ki saw ngut ki shynrang ha Lower Teksragre, Damal Asim.
Ka Assembly Committee kala shimkhia ïa kane ka jingjia hadien ka jingïohi ïa ka jingshah leh tohmet kane ka kynthei lyngbaka video bala saphriang ha ki social media.
Saw ngut ki briew kila patan ïa kane ka kynthei na sniuh bad bom naphang da u siej khlem ka jingisynei wat hapdeng ka jinglyniar bad jingkyrpad ban sangeh ïa kane ka jingpynshitom ba palat pud.
Ki Pulit kila register case ia kane ka jingjia ha Tura Women Police Station hapoh ki kyndon aiñ bapher bapher. Kat haduh ba thoh ïa ka khubor hynriew ngut ki briew kiba ïadonkti ki la shah kem ha ki pulit.
Ka Chairperson jong ka Assembly Committee on Women Empowerment, Kong Santa Mary Shylla, kala shimkhia mar mar halor kane ka jingjia bad kala phone ïa u SP ka WGH bad bthah ba un pynkloi ïa ka jingtohkit bad ban kem ïa baroh ki briew kiba donkti.
Ka Chairperson kala pyntip ruh ba kan sa leit hiar shen sha Ri-lum Garo bad kyntu ïa u SP ka WGH ban pynbeit ïa ka jingïa lang bad ki bahaïing jong kane ka lanot. Ha kane ka jingleit jong ka, ka kong Santa ka don jingthmu ban bthah ïa baroh ki SP bad ki Heh Pulit ba kin pynthikna ba kum kine ki jingjia kim dei ban jia shuh.
Haba kynthoh ïa kane ka jingjia, ka kong Santa kala pynpaw ïa ka jingbynniaw bad ong “Ka long kaba sngewsih ba ki Kynthei kin shah shoh hakhmat u paidbah. Ka dei ka bym khmih lynti satia. Ka dei ka kam bymman kaba khraw eh ha ngi. Ka Sorkar kan sa leh ïa kaba donkam bad ki kynthei kim dei satia ban don ka jingsheptieng. Ki dei ban tip ban ngin sa bthah ïa baroh ki SP ba kin peitngor bad shimkhia bha ïa kino kino ki kam bymman pyrshah ïa ki Kynthei”.

Leave A Reply

Your email address will not be published.