Tian bishar ki Pulit ha Kashari ïa ki san ngut kiba donkti ban shoh ïa ki nongñiah taksi

Shillong, Jymmang, 20: Ki Pulit jong ka Sadar Police Station ha ka sngi Saitjaiñ ki la tian bishar ha Kashari ïa ki san ngut ki bar jylla kiba la shah kem na Guwahati ha ka sngi Thohdieng halor ka jingdonkti ban shoh pynmynsaw ïa ki arngut ki nongñiah taksi ha ka miet sngi Palei ha Khyndai Lad, Shillong.
Ki arngut ki nongñiah taksi kiba la mynsaw ha ka jingshah thombor ki long u Banshai Syiem na Laitkor bad u Ïohborlang Kharsohnoh na Jongksha kiba ju kamai taxi.
Ka jingïohkem jong ki Pulit ïa ki san ngut ki runar ka la jia tang hapoh khyndiat kynta hadien ba ka East Khasi Hills Local Taxi Welfare Association (EKHLTWA) ka la ai por 24 kynta ïa ka tnad Pulit ban kem ïa ki runar.
Ki nongñiah taksi kiba don hapoh ka shatri jong ka East Khasi Hills Local Taxi Welfare Association (EKHLTWA) kiba dap da ka jingartatien hadien ba ki lad pathai khubor ki la pynmih ïa ka khubor bad ka dur ba la kah ïa ki durkhmat ïa kiba la phah da u Superintendent of Police (SP) ka East Khasi Hills, ha ka ka sngi Saitjaiñ ki la tur sha Shillong Sadar Police Station ban dawa ïa ki Pulit ba kin pyni ïa ka dur jong ki san ngut ki bar jylla kiba la shah kem.
Katba ki nongñiah taksi lem bad ki nongïalam jong ka East Khasi Hills Local Taxi Welfare Association (EKHLTWA) ryngkat ka jingsynran lang jong ki nongïalam ka Hynñiewtrep National Youth Movement ki dang thmu ban rung sha Shillong Sadar Police Station ki la shah pakhang lynti ha ki Pulit kiba la ap pahara ïa ka khyrdop ba la pyndait tala hadien ba ki Pulit ki la pyntip ba yn ym shah ïano ïano ruh ban rung kynhun hapoh kane ka thanat.
Dei tad ynda haba u President jong ka EKHLTWA u Bah Wandonbok Jyrwa u la telephone ïa u Superintendent of Police (SP) ka East Khasi Hills u Bah S. Nongtnger la shah tang san ngut ki nongïalam ban rung shapoh ka Thanat.
“Ngi la ïakynduh ïa ki Investigating Officer jong kane ka case bad ki la pyni ïa ki kot ki sla ba la thoh ïa ki jaka shong jaka sah bad ïa ki jingsoi jong ki (san ngut kiba la shah kem) bad na ka liang jong ka aiñ kam shah ïa ngi kum ki riewpaidbah ba ngin peit (ïa ki durkhmat jong ki san ngut kiba la shah kem) hangne ha thanat namarba la tian bishar ha Kashari. Yn sa khot ïa ki nongsakhi ki jong ngi ha Kashari khnang ban pynshisha la ki dei ne kim dei,” ong u Bah Wandonbok Jyrwa haba ïakren bad ki lad pathai khubor.
“Ka jingïakren ka long ba shi spah na ka shispah la kem ïa ki (ba donkti) na Guwahwati. Baroh shikatta ki la tharai sniew namarba hynin mynmiet namarba ym ikop ba kin dei kita ki khar Punjabi. Ynda ngi la ïapeit ïa, ngi shem ba ka tnat Pulit ka la leh ïa kaba donkam eh,” u la bynrap.
U la ïathuh ba ha Kasharai yn shah tang ïa ki nongsakhi ban pynshisha.
Shuh shuh u la ïathuh ba ka Association ka la ïakren bad ki bahaing jong ki arngut ki nongñiah taksi ba dei ban dawa ïa ka bailutksan. “Kam dei patde tangba ladep siew ïa ka bailutksan yn shu pynjem noh. Ïa ka bailutksan ngin buh beit hakhmat ba dei ban siew bad kam dei tangba la siew ïa ka bailutksan ban shu ïa map noh,” la bynrap u Bah Jyrwa.
Haba pynskhem ïa ka jingdawa ba ka Khasi Hills Autonomous District Council (KHADC) ka dei ban pynlong ïa ka jingkhynra Labour License ïa ki bar jylla kiba ju ñiah kali kamai, u Bah Jyrwa u la ong, “kumba ka District Council ka oh khajna Professional Tax na ki Khasi bad ka dei ruh kumno ban nang ban oh khajna na ki bar jylla halor ka Trading License bad ka Labour License.”
“Ha ka Lah Sngi U Blei ngin sa leit ïakynduh ïa (u CEM) jong ka District Council bad lada ka pynslem ïa kane ka kam na ka liang jong ngi ngin ïaid beit shakhmat,” la ong une u nongïalam jong ka EKHLTWA.