Shillong, Jymmang 20 : Ka Deputy Commissioner ka North Garo Hills ka Mitali Chandra ka la phah tohkit bad bthah ban pynpoi ïa ka kaiphoi halor ka jingkynnoh donkti jong u Chief Executive Member (CEM) ka Garo Hills Autonomous District Council (GHADC) ha ki kam tih bad khaïi dewiong beaiñ namar um phah khang satia ïa ka jingtih bad khaïi beaiñ ïa u dewiong ha Ri-lum Garo.
Ka Chandra ka la bthah ïa u Superintendent of Police ka North Garo Hills, Divisional Forest Officer (T) ka East bad North Garo Hills, Divisional Mining Officer ka East bad North Garo Hills bad u Block Development Officer ka Resubelpara ban pynthikna ïa kane ka jingkynnoh bad aiti ïa ka kaiphod halor kane ka kam shuwa ka 26 tarik Jymmang.
Ha ka shithi, ka Chandra kala ong “Halor ka mat ba la kdew haneng, nga phah sha phi ïa ka copy jong ka shithi bala ïoh pdiang na A Kharshiing, Under Secretary ka Tnad Mining & Geology ka Sorkar Jylla, Shillong bad ka shithi bala pyndait lang ba ïadei bad ka jingujor pyrshah ïa ka jingkhaïi beaiñ ïa u dewiong ba la kynnoh donkti lang u CEM ka GHADC”.
Halor kane, la kyrpad ïa phi ban pynthikna ïa kane ka jingkynnoh bad ban aiti ïa ka kaiphod halor kane ka kam sha kaba soi ïa kane ka shithi ha la shuwa ka 26 tarik Jymmang.
