Thwet ki Pulit kiba donkti ban sam shithi dawa pisa thok ha ka kyrteng ka HNLC
![](https://mawphor.com/wp-content/uploads/2023/07/20230721_170802-500x430.jpg)
Shillong, Naitung, 27: U Symbud Myntri Rangbah ka Jylla uba peit ïa ka tnat Kam Pohing Bah Prestone Tynsong ha ka sngi Palei ula ong ba ki Pulit ki la pynlong ka jingtohkit kaba bniah bad ka jingthwet ïa ki riewshim kabu kiba donkti ban sam ïa ka shithi dawa pisa “thok” ha ka kyrteng jong ka seng kieng atiar Hynñiewtrep National Liberation Council (HNLC).
Ha ka jingïakren bad ki lad pathai khubor, u Bah Tynsong u la ong ba ki Pulit kin sa wad la ka don neem ka jingthmu ban pynpulom ïa ka jingïakren ïasuk hapdeng ka Sorkar Pdeng, Sorkar Jylla bad ka HNLC.
U la ïathuh ba hadien ba la sdang ka jingïakren ïasuk, dalade hi u la ïakynduh ïa ki nongïalam jong ka HNLC bad ban ïathir ïatai bad ki halor kine ki ishu namarba ïa mynta ka long kaba suk ban shna ïa ki Letter Head thok.
“Dang khyndiat bnai, katto katne ki briew ki la ïoh pdiang ïa ki shithi dawa pisa. Nga la ïakren ruh bad ki (HNLC) bad ong ba phi donkam ban shimkhia halor kane bad ban leh eieei namar mano mano ruh ki lah ban pyndonkam bakla ïa ka Letter Head jong phi khlem da ïoh ïa ka jingmynjur. Ka HNLC ka la mynjur ban leh ïa kata,” ong u Bah Tynsong bad bynrap, katto katne na ki nongïalam ka Seng dang shen ki la pynshai ba ki shithi dawa pisa kim dei satia la ai da ka HNLC.
“Nga sngewkmen haduh kane ka khyllipmat ba ka HNLC ki da shimkhia ïa ka jingïakren ïasuk kaba la urlong,” u la ong bad kular, “ki Pulit ki la leh la ka jong ka kamram ban wad mano kiba donkti bad kaei ka jingthmu jong ki? Hato kan dei neem ka jingthmu ban pynpulom ïa ka jingïakren bad ka Sorkar India, ka Sorkar Pdeng bad ka HNLC?”
Shuh shuh u la ong ba bun ki jingïalang kin dang bteng bad ka HNLC kum shi bynta ka jingïakren ïasuk. “Nga thikna ba shen ngin sa leh ban poi sha ka wat kaba khatduh ban shim rai,” u la ong.
Haba kylli halor ka jingpynmih kyrwoh ka HNLC kaba kyntu ïa ki paidbah ban noh synñiang sha ka seng, u Bah Tynsong, ula ong, “naduh ba ka jingïakren ïasuk ka la sdang, ha nga shimet nga sngew ba ladei ban pynsangeh lut nadong shanong. Ai ba ka jingïakren jong ngi kan ïaid shakhmat hapdeng ka Sorkar Pdeng, Sorkar Jylla bad ka HNLC bad ngi kwah ban pyndep shwa ïa ka jingïakren.”
“Ngi kyntu ruh sa shisien ïa ka HNLC ban shimkhia ïa kane ka kam, bad ngin ïai ap na ki katto katne ki jingpynsngew ba kin buh ha ka jingïakren ka ban sa long,” u la bynrap.