Thwa khyndew bad maw ha ka surok Ratacherra -Malidor sahkut ki paidbah palat 24 kynta khlem bam

Khliehriat, Jymmang 15 : Na ka jingther jong u lapbah lapsan ha kine ki khyndiat sngi bad haduh mynta ka sngi ruh sha East Jaintia Hills, ka la jia ka jingtwa khyndew bad maw kaba jur bha ha ka surok bah ( National High Way) Ratacherra-Malidor ha kaba ki kali baroh kim lait shuh ban ïaid bad sahkut ha katei ka thaiñ la palat 24 kynta bad kane ka la wanrah ka jingeh ïa ki paidbah ba leit ba wan na katei ka surok namar ki khlem ïoh bam satia palat 24 kynta.
\ “Bun ki paidbah kiba ïaid lynti na kane ka surok ki la kynduh ka jingeh kaba khraw ha kaba kim ïoh ka bam ka dih, don ruh kiba hap ban ïaid da ka kjat hapdeng ka jyrsieh bad hapdeng u slap ban wad ïa ki dukan ban ïoh jingbam namar ki sahkut ki kali ha ki jaka bym don dukan. Ki briew kiba ïaid lynti na kane ka surok ki dei kiba wan na ki thaiñ Barak Valley, Silchar jongka Assam, kiba na Mizoram, Tripura bad Manipur.
Kat haduh ba thoh ïa kane ka khubor, Da ki hajar tylli ki kali ba kynthup ki kali rit , ki trok bad ki bos Night super ki dang sahkut ha kane ka jing shah khang lynti kaba la palat ïa ka 24 kynta kaba na ka daw ka jingtwa ki lum bad ka khyndew ka la hap hadpeng surok. Ki thymmei khubor ki ïathuh ruh ba la i donkam bun tylli ki JCB ban pynkhuid ïa ka surok bad don ruh ki JCB kiba hap ban wanrah na Assam. Ka jingtrei ban pynkhuid ïa ka jingtwa ban lait ki kali ban ïaid ka long baroh shisngi hynrei namar ba jur u slap bad duna kine ki JCB ka kam ka suki bad nalor ba ka jingtwa ruh ka dang ïai tuid beit na sharing lum sha surok.
La ban ong ba ka jinglong jingman ka surok ha ka thaiñ Narpuh ka dang buh jingma ïa ki nongleit nongwan namar ym lah ban tip ha kano ma ka por ka khyndew kan twa bad kan hap sha surok, kumta na ka liang ki bor District jong ka East Jaiñtia Hills District lyngba u Deputy Commissioner u Abhilash Banarwal, u kyntu ïa ki paidbah ba kin long kiba husiar bad sumar bha ha ka leit ka wan.
Kumjuh ruh, ha kaba ïakren bad u Mawphor, u Abhilash Banarwal, u la ïathuh ba ki bor district mynta ki dang pynkhreh shaid shaid bad shim khia ban pynpoi ki lad ai jingïarap ïa ki paidbah kiba dang sahkut ha kane ka jingdheng kali. Ki bor district ki la pynkhreh mar mar bad la lah ban pynpoi ïa ki jingbam, kum ki biskit, ka um dih bad kiwei kiwei ki jait jingbam namar bun ki nongleit jingleit mynta kiba la shu shah thngan ha surok.