Shillong, Risaw 02: Ka khubor ba la ïoh la ïathuh ba ka Sorkar jylla mynta ka la pynkhreh ban wanrah ïa ka song ba kyrpang kaba thmu ban kyntiew ïa ki District kiba ju duna bha ha ka jingpass ki khynnah ïa ki Eksam ka Meghalaya Board of School Education (MBoSE) kaba la long ha kine ki snem ba la leit.
La ong ba ïa kane ka song ba kyrpang yn sa pyllait hapoh ka “CM Impact Programme”, ong u Myntri ka tnad Pule Puthi Rakkam A Sangma.
“Ngi la dep ithuh ïa ki District kaba ka jingpass ki khynnah, khamtam ha ki eksam ka Board, kam da long kaba ihun. Ngi la shna ïa ka prokram ba kyrpang ban leh eiei halor kane,” ong u Rakkam.
Ha kaba iadei bad kane na ka liang u Myntri ula pyntip ba ka Sorkar ka la shim ïa ki buit treikam bapher bapher ban kyntiew ïa ka jingpass jong ki khynnah, kynthup ïa ka jingailad ïa ki khynnah ba kin ïakhun ïa ka eksam haduh arsien ha ka shisnem.
Shuh shuh haba kren halor ka bynta jong ki nonghikai bad ka jinglong jingman ha ki skul, u Myntri ula ong, “Ki nonghikai ki donkam ban pynïajan bha bad ki khynnah bad ki skul ki dei ban wanrah ïa ka jinglong jingman kaba pynsngewtynnad ïa ki khynnah ha ka jingai jinghikai”.
Ha u snem 2024, ka jingpass jong ki khynnah ha ki eksam ka MBOSE ka long, ki klas X ka long 55.80%, katba ha ka klas XII ka jingpass ka kot 79.76% kaba hiar na ka 80.30% ha u snem ba la lah.
