Thmu ka Sorkar ban iehnoh ka jingshna ïa ka surok 4 lane na Mawryngkneng sha Puriang

Shillong, Risaw 15: Palat 32 tylli ki shnong jong ka shnong Puriang kaba hab hapoh ka East Khasi Hills District ki la kyrpad ïa ka jingtuklar lang jong ka Deputy Commissioner halor ka jingkynnoh ba ka sorkar kan iehnoh ban pyntrei ïa ka surok 4 lane jong ka National Highway na ka shnong Mawryngkneng sha Puriang.
Katkum jingong jong ki, ka jingshna ïa ka surok 4 lane na kawei ka surok kaba thymmai da kaba ïaid lait noh na ka surok kaba mynta khlem artatien kan ktah ïa ka ïoh ka kot ka kamai kajih jong ki nongshong shnong kiba shong basah ha shilynter jong kane ka surokbah.
Ha ka shithi ba ki la aiti sha ka DC ka Kong RM Kurbah ha ka 3 tarik mynta u bnai, ki nongshong shnong kiba mad ïa kane ka jingeh ki la ong ba bun na ki, kiba shong basah hapoh ka shnong Mawryngkneng bad Puriang ki la sam ïa ka bynta jong ka jaka jong ki ha u snem 2007 sha ka sorkar na ka bynta ka jingthmu jong ka ban shna ïa ka surok 4 lane na ka National Highway 44 bad ki la pan ïa ka bai lutksan na ka bynta ka jaka jong ki kaba long katkum ka dor ba la buh da ka sorkar.
“Hynrei ba mynta ngi la ïoh jingtip ba ka sorkar kan iehnoh ïa kane ka surok 4 lane na kane ka surok kaba mynta kaba ka sorkar ka la shim bad siew ruh ïa ka bailutksan ha ka snem 2007-2009 bad ha ka jaka ban pynbeit hynrei ka la shim noh da kawei ka surok kaba thymmai da kaba ïaid lait noh na kane ka surok kaba mynta bad lada ïa kane ka surok ba thymmai la shna kan sa wanrah ka jingeh kaba khraw bha ïa ka ïoh ka kot bad ka kamai kajih jong ki nongshong shnong kane ka shnong bad bun na ngi kiba la shaniah tylli na kane ka surok na ka bynta ki lad kamai jakpoh ngin sa long kiba khlem kam khlem jam bad kan don ruh ka jinghiar ha ka ïoh ka kot jong ki nongshong shnong,” ki la ong.
Kitei ki shnong bad ki nongshong shnong kiba mad ïa kane ka jingeh ki la ong, “Hadien ka jingkhmih lynti ha u snem 2007-09 ïa ka jingthmu ba kan don ka jingpynheh ïa ka surok 4 lane jong kane ka surok kaba mynta na Mawrynkneng-Puriang, bun na ngi ki nongshong shnong ngi la sdang ïa ki kam khaïi kum ka jingbuh ïa ki petrol pump, ki line hotel, ki dukan shna tyre, dukan sha, dukan die jhur bad kiwei kiwei pat ki kam khaïi bad bun na ki samla khlem kam khlem jam ki la ïoh ïa ki kam da kaba plie ïa ki dukan die jingdie ha shilynter kane ka surok kaba mynta bad ngi la kyrmen ba kan don ka jingkiew ha ka ïoh ka kot ha kane ka shnong.”
Shuh shuh ha ka shithi ki la ong ba ka sorkar kan sa hap ban pynlut ïa ka pisa paidbah lada ka rai ban ïaid shakhmat ban shna ïa ka surok 4 lane project na ka surok kaba thymmai.
“Lada ka sorkar ka rai ban iehnoh ïa ka jingshna ïa ka surok 4 lane na kane ka surok kaba mynta ha kaba ïa ki jaka puta ka la dep ban shim bad siew, ka sorkar kan hap ban pynlut biang sa kumba 10 shah ka pisa paidbah da kaba shna ïa ka surok kaba thymmai naba ka hap ban mait bad pom ïa ki dieng, ban pynmadan ïa ki lum bad ki jaka rep ka ban wanrah shibun ka jingjulor ïa ka sawdong sawkun bad ka jingjyrngam jong kane ka thaiñ.”
Haba kyrpad ïa ka DC ban tuklar ïa kane ka kam, kine ki nongshong shnong ki la ong, “Ngi kyrpad jur ïa phi ban peit jylliew bha ïa kane ka jingeh bad ban ai ka jingpynsngew pynthikna kaba biang khnang ba ka ïoh ka kot jong kiba bun ki nongshong shnong kiba shaniah na kane ka surok kaba mynta naduh ki por kiba mynshwa, kin ym shah ktah bad shuh shuh, bad ba ka sorkar kam dei ban iehnoh ïa kane ka surok 4 lane kaba mynta khnang ba kan ym ktah ïa ka jingim ki briew kiba sah ha shi lynter kane ka surok.”