Ther u Saleng ïa u Mukul

Shillong, K’Lyngkot 23 : U Saleng Sangma, MLA ka NCP ba dang shu dep resain shen u la kynnoh ba ka jingwan pynïasoh jong u sha ka Congress kadei hadien ba u briew uba kynjat ïa u na ka Congress ha ki khyndiat snem mynshwa um don shuh mynta ha katei ka party bad u la phet sha ka Trinamool Congress.
Watla u khlem pynpaw ïa ka kyrteng jong ki nongïalam Congress mynshwa kiba weng ïa u na ka party, hynrei na ka jingkren jong u la sngewthuh ba u thmu beit ïa u Nongïalam ka Liang Pyrshah, Dr. Mukul Sangma ba dei ruh u Myntri Rangbah barim ka jylla.
Ha kane ka sngi, shwa ban leit pynïasoh sha ka Congres u Saleng u la leit ban resaiñ shwa kum u MLA kaba u jop ha u 2018 na ka party NCP. Hadien kane pat la pdiang burom ïa u da ki nongïalam ka party kynthup naduh u President, Bah Vincent H Pala, Bah PN Syiem nalor kiwei kiwei ha ka jingïalang kaba long ha Congress Bhavan.
Na ka liang u Saleng haba kren bad ki lad pathai khubor u Saleng u la kynthoh tyngeh ïa u Dr. Mukul da kaba ong ba dei ma u (Dr. Mukul) ba kynjat ïa u na ka Congress. “Hynrei utei u briew uba kynjat ïanga shabar ka Congress mynta ïalade um don shuh hangne. Dei na kata ka daw ba nga la don biang hapoh,” u la ong.
Ha kawei pat ka liang, u Saleng u la kob ruh ba dei tang ma u, u MLA shimet uba nud ban shong ha ka Liang Pyrshah haduh san snem kynthih ha ki snem ba la dep.
“Peit kumno u Mukul Sangma bad ka kynhun ki don ha ka Congress hynrei kim lah shah ban don lang kum ka kynhun na ka bynta san snem. Kaei kaban jia ïa ki lada ki sah marwei kumba long manga? Hato don mano mano ba nud ban sah marwei kumba long manga ha ka Liang Pyrshah baroh san snem?’ u la kylli. Na ka liang utei u MLA u la ïathuh ruh ba um kwah satia ban pynïasoh sha ka BJP namar um kwah ban pynmong ïa ka jingsngew jong ki paid Khristan ka jylla.