Shillong, Naitung 22 : U Myntri Sorkar bad MLA ka Jowai u Ma Wailadmiki Shylla ula ther ïa ka Liang Pyrshah Voice of the People Party (VPP), haba buh jingkylli ïa ka jinglah jong ka ban pynïaid ïa ka synshar khadar haba ai nuksa ïa kaei kaba jia ha KHADC.
Une u Myntri Sorkar ula kyntu ïa ki paidbah ba kim dei ban ngeit ha ki jingkynnoh ba laiphew jait laiphew rukom jong kane ka Seng kiba long pyrshah ïa ka Sorkar MDA ba ïalam da ka NPP namar ki jingkynnoh ki long ki bym shisha bad ki bym don nongrim kiba ïalam bakla suda.
Haba kren ha ka rynsan ïalap elekshon shiteng samoi ka Shillong Lok Sabha na ka bynta u kyrtong ka NPP Dr DRL Nonglait ba long ha Ummulong Madan Khawang ha ka miet sngi Ba-ar, u Ma Wailad ula ong ba ka VPP ka la ñiew poh ïa ki bor synshar shnong hadien ba wanrah ïa ka Act hapoh KHADC bad hadien kala pyndam ïa ki kyndon kiba buh ïa ki Rangbah Shnong ban ai syrnot ïa ki jaka ha ki shnong ki thaw.
“Hato kane kam dei ka jingknieh noh ïa ka bor jong ki Rangbah Shnong jong ngi” ula buh jingkylli.
Ula kynnoh ba ki nongïalam ka VPP ki la wan sha Jowai ban pynpaw ïa ka jingpyrshah ïa ki kam pynroi kiba la pyntrei hapoh ka constituency, watla ma ki dalade ki la pyni ba kim don satia ïa ka jingïatylli.
Haba kynthoh ïa ki 4 ngut ki MLA ka VPP, u Bah Wailad ula ong ba kane ka party kam shym la lah ban wanrah ïa ka jingïatylli wat hapoh ka District Council.
“Kala don ha ka bor ha KHADC tang shisnem tam. U CEM ula iehnoh kam, u EM ula iehnoh kam. Hato kane ka dei ka ïing kaba im ha ka jingsuk bad jingïatylli?. Ki dang shu sdang ban synshar ha KHADC hynrei phi la ïohi hi dalade ïa ki kam ba kim shym la ïaid beit ïaid ryntih. Ki la wanrah ïa ka kynrum kynram ha ki Hima kum ka Sohra bad Langrin halor ka kam thung Syiem” ula ong.
Ula kdew ia ka jingïakhih ba dang shen jong ka Hima Sohra bad ka jingkynnoh ba ki samla kiba kyrmen ban ïoh kam, kila shah beh kam pynban ha KHADC tang mar syn shimti ka VPP ïa ka bor ha kane ka Council.
“Ka dang shu sdang ban shimti ïa ka jingsynshar ha KHADC hynrei ki la mih pynban shibun ki kynrum kynram. Pyrkhat phi ïa kaei ka ban jia lada shisien ka por phi ai ka kabu ïa ki ba kin pynïaid ïa ka Jylla baroh kawei” ula bynrap.
Hynrei ula ong ba peit sha ka NPP kaba don 32 ngut ki MLA, kala pyni ïa ka jingtylli bad kala kren tang da kawei ka sur bad minot thop ruh ha kaba shakri hok ïa ki paidbah lyngba ki kam pynroi pynpar.
“Phin nym ïohsngew ïa u Symbud Myntri Rangbah Bah Sniawbhalang Dhar ban kren pher na kaei kaba kren u Bah Prestone Tynsong lane u Myntri Rangbah. Wat haduh mynta ngi dang dei ka ïing kaba im ha ka jingsuk bad ka jingïatylli” ula pynpaw.
U Ma Wailad ula jubab ruh ïa ki jingkynnoh jong u President ka VPP halor ki kali jong ki MLA.
U iathuh ba ma u, ula leit la wan da ka kali Sorkar ka Fortuner kaba don u nombor ML01, katba u President ka VPP watla um don satia ha ka Sorkar, ula pyndonkam da ka kali Fortuner shimet.
“Naba ïa nga, kum u Myntri Sorkar nga la ïoh ïa ka Fortuner ka Sorkar, hynrei ngi hap kylli nano u President ka VPP u ïoh ïa ka Fortuner” ula buh jingkylli.
