Kyrshan ka HYC ïa ka samla ba ïakhih, mynta ka jingïalang ha khyrdop Assembly barim
Shillong, Naitung 22: Ka Hynniewtrep Youth Council (HYC) Education Cell da ka jingsngewkhia ïa ka jinglong jingman ki samla kiba ïakhih jai jai ha nongbah Delhi, ha ka 23 tarik kan pynlong jingialang paidbah ha khyndai lad ha khyrdop jong ka Assembly barim ban pynpaw ka jingkyrshan ïa ki.
Haba kren sha ki lad pathai khubor u Bah Enlang Sawian uba dei u Education Secretary ka HYC seng kmie u la ong kane ka jingïakhih paidbah kan sdang ha ka por 4 baje noh phai sngi bad kane ka jingialang ka long ban ai ka jingkyrshan ïa ka kynhun Cockroach Janta Party kaba dang pynlong ka jingiakhih ha nongbah Delhi ha Jantar Mantar kaba dawa ïa ka jinghiar shuki jong u Union Minister ba peit tnad pule dangle u Dharmendra Pradhan ban wanrah ïa kata ka jingkylla ha ka National Exam System.
U Bah Sawian u la ong, Ka daw ba ngi iohi ba ka jingiakhih jong ka CJP ha Delhi ka long ba na ki snem sha ki snem ka don beit ka jinglait tuh ki jingkylli ha ki eksamin thungkam ha ki national level man u snem.
“Kane kala ktah ïa ka jingmut jingpyrkhat jong ki ba bun ki samla pule bad khamtam na ka thain North East jong ngi bad dei halor kane ka nongrim ka seng kum ka dak ban ai jingkyrshan ïa kane ka kynhun jong ki samla kiba dang pynlong jingiakhih ha nongbah Delhi, ngi sa khot ïa kane ka jingialang mynta ka sngi” u la ong.
U Bah Sawian u la kyntu ïa baroh ki nongshong shnong ka jylla bad khamtam eh ïa ki samla pule, ki seng samla shnong, ki riew rangbah bad ïa ki kynhun bapher bapher ban wan ai ka jingkyrshan.
Na ka liang jong ka seng kila phah ruh ïa ki notice sha ki samla pule ha ki skul bad College bad kumjuh ruh ïa ki skulbah bad la phone ruh ïa ki Union ha ki College level bad kumjuh ruh ha skulbah.
Ka seng ka kyntu ïa ki samla pule kiba don ïa ka jingkitkhlieh namar ba kane kam dei ka jingiakhih jong ka HYC lane kam dei ka jingiakhih jong ka kynhun samla ba ialam CJP hapoh nongbah Delhi hynrei kadei ka jingiakhih bad ka jingkit khliej jong u wei pa u wei u samla pule bad kadei ruh mat kaba ktah ïa ka lawei jong ki samla pule, u la ong..