Ther ka UDP(YW) ba pyndonkam u CM da ka Helicopter, buh jingkylli halor ka jingkiew spah kynsan ka NPP

Ym ju jia koit ban mih kynsan ki skhim shuwa ka elekshon

0

Shillong, K’lyngkot 17: Ka United Democratic Party State Youth Wing, ha ka sngi Ba-ar ka la takraiñ ïa u Myntri Rangbah ka jylla halor ka jingpyn donkam jong u da ki helcopter ha ka jinglei sha kino kino ki prokram la ki dei ban plie maw nongrim ne leit sha ki prokram ka party.
U samla Desmond u ong ba kane ka jingpyn donkam beit jong u Myntri Rangbah da ka helicpter wat ha ki jaka khap sor bad ka daw ba la ai da u Myntri Rangbah ka long ba sniew palat ka surok.
“Hato ka jinglut jingsep ka lut na ka pisa ki paidbah ne na ka pisa party(NPP)?” u la buh jingkylli.
U Joint Chief Organizer ka UDP-YW, u Bah Auguster Jyrwa u la bynrap shuh shuh da kaba ong lada ka NPP ka pyllut na ka bynta ka jingleit jingwan u Conrad da ka helicopter, kaba mut ka NPP ka dei ka party bariewspah bad tang ha ka wei ka term jingshynshar jong ka.
“Ka NPP ka ïoh pisa naei haduh ba kan da thong da pisa ïa ki paidbah bad ki minister”, la ong u samla Desmond da kaba pynkynmaw ruh ba u cabinet Minister, u bah Banteidor Lyngdoh u la shah tyrwa 5 klur ban rung sha ka party NPP. “Naei ka NPP ka ïoh pisa ban thong katta ka dor baheh?” ki la buh jingkylli.
Shuh shuh ka Yout Eing jong ka UDP ka la maham ïa ki paidbah ka jylla ba kin nym ngop ha ki scheme ba ai da ki minister jong ka National Party.
U Bah Desmond u la ong “ki scheme bad ki kam pynroi mynshuwa kim juh mih hynrei mynta shuwa ka elekshon ki mih kynsan, bad kine ki scheme ki dei ki buit pynbiej briew da ki nongïalam National Party”.
Ka UDP State Youth Wing ka pynsngew bad ka buh ruh ka jingkylli sha ki paidbah, “ba na kine ki skheme pynroi jylla ba la pynpaw ha ki banner ba la buh da ki National Party, ki da la long shisha ne em ban kyntiew ïa ka jylla”.
Shuh shuh, ki la pynpaw ruh ka jingbym sngewtynnad halor ka jingsa ktah ki banner ba la buh da ki National Party ha kylleng ka sor kaba pynwit lynti ïa ki paidbah bad ruh la pynsniew dur ïa ka Sor Shillong.

Leave A Reply

Your email address will not be published.