Thep kyrteng arngut ki kyrtong shimet ban aireng na Mawsynram bad Sohryngkham constituency

Shillong, K’Lyngkot 27 : Ki don arngut ki kyrtong shimet kiba la pyndep ïa ka jingthep kyrteng ha kane ka sngi Nyngkong ha ophis treikam ka Deputy Commissioner ka East Khasi Hills, na bynta kane ka elekshon MDC kaba la buh ban long ha ka 21tarik u Rymphang mynta u snem.
Kine ki kynthup ïa u Bah Daniel Wahlang u ba pynkhreh ban aireng na Mawsynram constituency katba uwei pat dei u Dr. OS Jyrwa uba la pynkhreh ban ïakhun na Sohryngkham constituency.
Haba kren bad ki lad pathai khubor, na ka liang u Bah Daniel Wahlang u la ong ba ka jingmih ban ïakhun kum u kyrtong shimet ym shuh na ki party kadei namar u la i ngiah ïa ka rukom treikam jong ki seng sainpyrthei bapher bapher kiba don ha ka jylla.
“Ngi lah ban ïoh ïa ki party ban mih iakhun hynrei lada ngi shim kulmar ïa ki seng saiñpyrthei u paidbah un pyrkhat ïangi ba ngi mih ban ïakhun elekshon tang ban myntoi shimet lane tang ban ïoh pisa. Hynrei haba nga mih kum u kyrtong shimet kam don shuh ka jingkynnoh,” u la ong.
Nangta u ong ruh ba ki don bun kiwei ki samla ne ki rangbah kiba la trei bad noh synniang bha ha ka imlang sahlang hynrei tang namar ka jingduk kim nud shuh ban mih pyrthei.
Katba na ka liang na u Dr. OS Jyrwa pat u la ong ba ka jingmih jong u ban ïakhun kum u kyrtong shimet kadei namar ka jingpynbor palat ki paidbah bad ki nongkyrshan jong u khamtam haba ha ki elekshon ba la dep u la shu rem salit bad wan ba ar ha ka elekshon MLA kaba dang shu dep.
“Nga la ïaleh elekshon la lai sien tang ha ka elekshon MLA, kata naduh u snem 2008, 2013 bad ha u 2023. Naduh u snem 2018 ki paidbah ki la pynbor ïanga ban ïaleh ia ka elekshon MDC ha u snem 2019 tangba ha kato ka snem ngam shym la treh. Mynta ka sien ha ka elekshon MLA 2013 ki paidbah ki la trei borbah hynrei ngi rem salit bad wan ba-ar. Te mynta ka kynti ki la pynbor biang ïanga ban ïakhun ïa ka elekshon MDC bad kumta nga la rai ba ngan kohnguh ïa ka jingkyrpad jong ki nongkyrshan ban ïakhun,” u la ong.
Ha kane ka sngi thep kyrteng kaba nyngkong baroh ki don lai ngut ki kyrtong kata kynthup lang ïa u kyrtong ka NPP na Laitumkhrah – Malki, Bah Fantin Joseph Lakadong.