Thaw komiti ka Health Deptt. ban bishar ïa ka jingdawa ki samla ba la pass Pharmacist

Shillong, Nailur, 24: Ka tnat ka Koit ka Khiah jong ka Sorkar Jylla kan sa thaw da ka Komiti ka ban khlieh da u Commissioner and Secretary ka tnat ka Koit ka Khiah u Joram Beda ban bishar bad ban khmih bniah ïa ka jingdawa jong ki samla kiba la pyndep ïa ka jingpule Pharmacist.
Ïa kane la pyntip da ka Myntri ka Koit ka Khiah ka Sorkar Jylla ka Dr. Mazel Ampareen Lyngdoh ha ka sngi Baar.
Shi kynhun ki samla kiba la pyndep ïa ka jingpule Pharmacist ki la aiti da ka dorkhas ha ka Dr. Ampareen Lyngdoh ha kaba ïadei bad ka jubab Right to Information (RTI) kaba ki la ïoh pdiang na ka ophis Directorate of Health Services (MI) bad pyntip ruh ba ka Sorkar Jylla kam shym la pynkha satia ïa ki post na ka bynta ki Pharmacist haduh kine ki sngi.
Ryngkat ka jingsynran lang jong ki paralok kiba la pyndep ïa ka jingpule Pharmacist, u samla Emosjohn Syiemlieh ha ka jingïakren bad ki lad pathai khubor u la ïathuh ba kum ki samla kiba la pyndep ïa ka jingpule ki la pynsngew ha ka Myntri ka tnat ka Koit ka Khiah ban kham pynbun ïa ki lad thungkam na ka bynta jong ki samla kiba la pyndep ïa ka jingpule Pharmacist da kaba seng ïa ki Pharmaceutical Industries hapoh ka Jylla bad ban thung ruh ïa ki Pharmacist ha ki District Hospital, ki CHC, ki PHC bad ha ki Sub Centre katkum ki kyndon jong ka Indian Public Health Standards (IPHS) bad ban thung ruh ïa ki Drug Inspector ha ki 12 tylli ki District jong ka jylla.
Halor kane ka jingdawa jong kine ki samla wadkam, ka Myntri ka la ong, “nga mynjur ïa ki katto katne ki mad jingdawa ba ki la wan pynsngew ha nga. Ki la pyntip ruh ha nga ba ka Service Rules jong ki Pharmacist haduh mynta ka dang sah pongding. Kine ki dei ki kam kiba eh bad ngi la rai ban thaw da ka Komiti khnang ba kan don ka jingïasyllok bad ki samla ba la pyndep ïa ka jingpule Pharmacist ki bym pat ïohkam kiba sngewba ka Sorkar ka donkam ban sngap ïa ki jingai jingmut jong ki.”
“Ngan sa thaw da ka Komiti ban sa khlieh da u Commissioner and Secretary ka tnat ka Koit ka Khiah u Joram Beda khnang ban tih bniah ba balei ym pat lah ban thungkam ïa kiba la pyndep ïa ki jingpule. Kane ka dei ka sien nyngkong ba ki la wan pynsngew sha nga bad ngan sa ïakynduh biang ïa ki ha ka 28 tarik mynta u bnai bad ngin sa khmih bniah ïa kaei kaba ngi lah ban leh noh kham kloi katba lah,” la ong ka Myntri.
“Katkum ka jingai jingmut jong ki, ngi sngewdei ba donkam ban pyrkhing ïa ka jingdie ïa baroh ki jait dawai ha ki dukan die dawai bapher bapher. Ngam ju tip ba ki don ar tylli ki jait laisen ban die ïa ki dawai. Kum ka nuksa, ka jingdie laitluid ïa ki thyrnia injek ha ka jingshisha kam dei ban long ha kane ka dur. Kine ki dei ki mat bakongsan. Ynda ngi ladep shong jingïalang ha ka 29 tarik, Risaw ngan sa pynsngew ha u Myntri Rangbah bad ngin sa peit ïa kaei kaba ngi lah ban leh,” ka la ong.
Haba kylli, ka la ong, ym baroh ki District ki don ïa ki Drug Inspector. “Naduh u snem 1972 haduh mynta ngi sakhi ïa ka jingpynkha district bad kumno yn lah ban tehlakam ïa ka jingdie dawai beaiñ lada ym don ïa ki Drug Inspector. Ngim lah ban ailad ïa kane bad ngi hap ban bud pyrkhing ïa ki kyndon bad ïa ka jingjurip dei ban pynlong khah khah. Ngi hap ban pyrkhing bha ïa kane katkum ka aiñ.”
Ïa ki jingai jingtip jong ki (samla wadkam) ngin sa pule bniah, ngin sa phah tohkit bad ngin sa pyntip sha u Myntri Rangbah halor kane, ka la ong.