Shillong, Jymmang 23: Ka Meghalaya Pradesh Congress Committee (MPCC) hynne ka sngi nyngkong, kala thalaiñ ïa u Executive Engineer ka Tnad PWD (Building) Bah Ransom Sutnga halor ka jingkynnoh ïa ka jingkhia jong u dome (tnum pyllon) ba wanrah ïa ka jingtwa jong ka Ïingdorbar Thaw Aiñ ka Jylla ba dang tei thymmai ha Mawdiangdiang.
“Kumno u Executive Engineer ka PWD (Building) u kynnoh ïa ka jingkhia jong u dome. Balei ba um buh jing kylli naduh ka sngi ba thmu ban pynieng ïa une u dome khamtam ba u dei uba don bad khmih ïa ka jingïaid jong kane ka project” ong u Bah PN Syiem, Working President ka MPCC haba ïakren bad ki nongthoh khubor.
Haba pynpaw ba ka long kaba bakla shibun banong ba ka jingtei kam lah ban kit ïa ka jingkhia jong u dome, u Bah PN Syiem ula ong “Balei une u Engineer un shim la iasyllok ïa u Myntri ba dei khmih ïa ka jingkhia u dome naduh kaba sdang, balei ba um iasyllok bad ka kompani ba pyntrei, iasyllok ïa ka IIT Roorkee kaba design ïa ka project”.
Une u Nongïalam ka Congress ula ong ba une u Engineer ula dei ruh ban buh jingkylli halor ka jingai sub contract ka Uttar Pradesh Rajkiya Nirman Nigam Ltd kaba dei ka PSU jong ka Sorkar Uttar Pradesh sha ka Badri Rai & Company ban pyntrei ïa ka project, watla kane ka kompani ka dei kaba la shah kyntait ha ka jingïakhun ban ïoh pyntrei ïa ka kam ha ka jingïathep tender.
“Ngan ong kumno shuh khamtam ba une u Engineer u dei ruh u ban long u kyrtong jong ka NPP na North Shillong Constituency ha ka elekshon MLA 2023” ula kynthoh.
U Bah PN Syiem ula ong ba ka Tnad PWD (BuildingP) kala pheil ha ka jingtreikam ym tang ha ka jingtwa u dome ka Ïingdorbar Thaw Aiñ ka Jylla hynrei wat ha ka jingtei ïa ka Inter State Bus Terminus (ISBT) ha Mawlai Mawiong.
“Nga sngew ba ka Sorkar ka dei ban shong bishar ïa ka jingtreikam ka Tnad PWD (Building) khnang ba kane ka Tnad kan nym buh ïa ka jingim jong ngi bad jong u paidbah ha ka jingma” ula ong.
“Nga sngew ba ym dei ban shu kynnoh tang ïa ki Contractor hynrei ban kynnoh ruh wat ïa ka tnad PWD (Building) halor ka jingbym ler ka rukom treikam. Ka jingbym ler treikam kala paw shai naduh ki bor ba hakhlieh haduh kiba rit eh” ula bynrap.
