Shillong, Rymphang 12: Ka Shnong Riatsamthiah ha kane ka kynti kaba hadien ba ka la ïoh ka Executive Committee kaba thymmai hapoh ka jingïalam jong u Rangbah Shnong uba thymmai u Bah Mariahom Kharkrang bad ka Executive Dorbar baroh kawei, ki la wanrah ka jingkylla kaba bun bha ki liang.
Ha kane ka snem kaba mynta ka Dorbar Shnong ka la ïoh ka jingmang ïarap ïa ki 10 tylli ki Solar Light ne ki bording kiba la pynmih da ka sngi ha kaba kane mynta ka shnong ka la thaba hi khlek shajan baroh ki dong bad ki kyntoit jong ka shnong.
Watla ka shnong kham hashwa ka la don ïa ki katto katne ki Solar light bad ki Street Light na ka MeECL hynrei kine kim pat long pura satia ban pynlong ïa ka shnong kaba shai thaba ha baroh kawei ka shnong, hynrei da ka jingïarap mang ai tiar da ka ophis Deputy Commissioner ka East Khasi Hills haduh 10 tylli ki Solar Light ha ka shnong, ka shnong mynta ka la thaba bha ha ka por mynmied.
Halor kane ka jingïarap jong ka Deputy Commissioner ban ai ïa kitei ki Solar Light na ka liang ki bor pynïaid shnong bad ki paid nongshong shnong ki la pynpaw ka jingai khublei kaba kyrpang ïa ka ophis Deputy Commissioner ka East Khasi Hills District baroh kawei.
Ha kawei pat ka liang lah ban pynkynmaw ha ki snem ba la dep na ka liang ka Dorbar Shnong Riatsamthiah ka la shim ruh ïa ki sienjam ban buh noh da ki Clamp hapoh ka shnong na ka bynta ban tehlakam ïa ka jingpynïeng kali pathar ka shnong.
Ha kane ka jingpyntreikam ïa kane ka kyndon na ka liang ka Dorbar Shnong hapoh ka jingkhmih ki Assistant Rangbah Shnong ka la ïoh ban pyndait clamp ïa shibun tylli ki kali kiba pynïeng kulmar ha ki jaka bym dei bad kiba la mana da ki bor pynïaid shnong bad halor kane na ka liang ka shnong ka kyrpad ïa kiba pynïeng kali ba ki dei ban ïatreilang bad ka shnong na ka bynta ka bha ka miat jong ka shnong, bad ka bha ka miat ki nongshong shnong baroh kawei.
