Shillong, Naitung 22 : Ka Jaintia National Council ha ka sngi Saitjaiñ ka la dawa na ka sorkar jylla ba kan pyndep noh ïa ka jingkular jong ka da kaba tei noh ïa ka mini secretariat ha Jowai.
Katkum ka kyrwoh ba la phah da u nongpyllait khubor ka Seng, Bah Mebanteilang Sukhlaiñ u la ong ba ïa ka mini secretariat ha Jowai dei ban tei noh thik kum kaba la tyrwa da ka sorkar ha Tura, West Garo Hills District.
U la pynkynmaw ruh ba ka sorkar ka la dep ban buh ïa u mawnongrim na ka bynta ban tei ïa ka mini secretariat ha Jowai ha u Nohprah jong u snem ba la dep hynrei haduh mynta ym pat paw dak ei ei ruh.
Utei u nongïalam ka seng u la buh jingkylli ruh ba imat ka jingwan buh ïa utei u mawnongrim hato kadei tang na ka bynta ka ishu elekshon.
Katei ka jingdawa jong ki nongïalam ka seng ka la mih hadien ka jingkren jong u Myntri Rangbah ba ka jingtei ai ka Mini Secretariat ha Tura kadei shi bynta jongka jingïaid shakhmat ban pynurlong.
Halorkane, u Sukhlain u la ong ba ka rilum Jaintia kadei kawei naki thain kaba pynmih bun bha ka khajna hynrei kaba sngewsih ka long ba kadei pat ka thain kaba shah iehbein tam kaba paw ba ka sorkar ka shu shim hynrei kam ju ai.
U la buh jingkylli ruh halor ka jingpynslem jong ka sorkar ban pyndep ïa ka Ïawmusiang market complex kaba la sahteng naduh u snem 2006.
