Ki buit stad thymmai ha ka khaïi pateng na ka bynta u Nongrep

Ki nongrep ki dei ki briew kiba trei shitom bad minot bha ha ki kam rep ki jong ki. Ki khie dangstep phyrngab ban pyndep shibun ki kamram, ban pynbiang ïa ki jingdonkam baroh la ka dei ha ka kam ri jingri- ban bsa sniang,ai bam syiar, ne ban pynbiang ki kam ki jam ha iing ha sem shwa ba kin leit sha ki lyngkha ki bri ki jong ki. Ki nongrep naduh ba sdang snem ki khreh ka trei ka ktah, ka puh ka dain la ha pynthor ban rep phan bud sa ka rep kba, ne ha lum ban rep riewhadem,phan,piskot bad ban rep bun jait ki jhur ki jhep. Kumne ki trei shitom, ki pynlut ïa ka por jong ki baroh shi snem ha la ki kam ki jam bad kiba bun ki nongrep ki shongthait tang ha ka por tlang ynda la dep shoh kba. Da ka jingtrei shitom jong ki, ki ïoh ban kheit ïa u soh bad da kumne ki lah ban pynbiang ïa ki jingdonkam ha iing ha sem. Hooid ki nongrep ki ïoh ban kheit shibun bah ki mar rep jong ki naduh u kba, phan, riewhadem ki jhur, ki soh-ki pai ba bun jait hynrei ynda la leit die pat ïa kine ki mar rep sha iew, kiba bun ki nongrep jong ngi kim ïoh ïa ka dor kaba biang, ka dor ba kin ïohnong katkum ka jingtrei shitom ba la pynlut. Kane shisha ka pyndiaw bad pynrit mynsiem shibun ïa ki bad ngi shem ruh artad ba kiba bun ki nongrep jong ngi hi, ki dang duna bha ka jingnang jingtip ïa ka dor ka mur, ka khaii ka pateng shaphang ka kam rep. Te dei ha kane ka nongrim ba nga kwah ban sam lem sha phi ki nongrep katto katne ki symboh jingtip ki jingai jingmut ba la pynwan dur da u riewstad E. Jerome McCarthy, u Professor na ri Amerika ha ki snem 1960 ba u khot ki Marketing Mix ba la sot na ka kot jong u, “Basic Marketing: A Managerial Approach” khamtam eh ban ïoh jingshai kumno ban khaii pateng ha ka rep ka riang na bynta ki nongrep bad ki entrepreneur.
U mar rep/Product- U mar rep uba ngi mut ban khaii pateng kum u jhur ne u soh u dei ban don kine ki jinglong ha kata ka rukom ba ki nongbam kin khein kor ïa u.
Ka jinglong ba kyrpang ne ka jingmyntoi/Function -Ngi dei ban tip bniah shaphang u mar rep, ki jingmyntoi lada pyndonkam ne bam ïa u, khamtam kiba ïarap na ka bynta ka koit ka khiah. Kumba ngi tip ba u kajor u ïarap bha na bynta ki khmat ba u don ïa ka jingbam Carotenoid Vitamin A. U ïarap ban pynkoit ïa ki jingmong ha ka met bad ruh ban pynkhlaiñ ïa ka bor immunity ban ïaleh pyrshah ïa ka jingpang. U krai ruh u dei uwei na ki jingrep ba lah rim bha ba ngi donkam ban tip khamtam eh ba u ïarap ban ïaleh pyrshah ïa ka jingpang duna snam ne anaemia, ka jingpang shini bad na bynta kito ba lah sngaid palat. Kumjuh ruh u jhur broccoli, u ïarap na ka bynta ka jingpang prostrate cancer ba u don ïa ki jingbam sulforaphane.
Ka dur ka dar /Appearance-U mar rep ba phi die barabor u dei ban long uba khuid, uba heh uba pynibang ïa ki nongthied kum u soh plum ne u sying u dei ban long uba khuid ba pliah, ba ibang ka jingheh, itynnad ka rong bad uba koit ba khiah, u ba lait na ka jingpang.
Ka rukom song /Packaging- Katkum ka jinglong u mar rep haba phi leit die sha iew kum u jhur ne soh, ngi dei ban da song da thep bha, ban i khuid, ban lait na ka jingjakhlia bad khamtam eh ban ïoh ïa ka dor kaba heh. Haba phi mut khaii ïa u mar rep khamtam leilei haba ki dei ki processed food product kum u achar lung siej ne u powder shynrai, ngi dei ban nang ka rukom song ïa u, ban pynitynnad ïa u. Donkam ban don ruh la ka marka ne ka Brand name bad ka license la la ïoh na FSSAI khnang ba ki paidbah kin tip ïa u shynrai jong phi bad ruh ba kin shaniah ïa ki jingbam jong phi.
Ka jingshaniah ïa ki mar rep /Warranty-Haba phi leit die ïa ki jhur ne soh jong phi dei ban pynthikna ba ki mar rep jong phi ki dei kiba bha, kiba dang shu dep kheit shen ne fresh produces bad ym dei kiba la sah miet ne pyut. Ki processed products kum ki fruit wine, ki achar, RTS juice dei ban pyni ne tah ïa ki expiry date, ki ingredients ba la pyndonkam ba ki briew kin tip bad kin shaniah ïa ki product jong phi.
Ka jingshakri /Service-Haba phi kwah ban khaii pateng kum u sying, u shynrai ne u syiar broiler ban long uta u supplier ngi dei ban buh barabor kata ka thong, ka jingmut ba phi dei ban long kiba lah ban pynbiang ïa u mar rep jong phi tista man la ka por sha ki nongkhaii ha iew ki hat lym kumta u nongkhaii um shaniah ïa phi. Ka ktien bad ka kam ka dei ban ïa ïaid ryngkat ryngkat. Kata ka mynsiem ban shakri, ka jingkitkhlieh ne ka jingshimkhia ïa ka kam dei ban don khnang ba u nongthied ha kano kano ka por ba u kylli na phi dei ban lah ban pynbiang mar ïa u.
Ka dor ka mur /Price-Ka dor-ka mur jong ki mar rep ka dei kawei kaba kongsan bha ha ka khaii ka pateng. Ka dor ka ïalam lynti ïa u nongrep bad ka ai mynsiem shibun, ka pynphuh sam rkhie ïa ki khamtam leilei haba ki mar rep ba ki die ki heh dor ha iew ha hat. Namar ha kaba kut kam don jingmut ban trei shitom, lada ngim ïoh ïa ka dor kaba biang,kaba ïohnong ha iew ha hat.
Ka jingïohnong /Profit Margins-U nongrep uba pynmih ïa ki mar rep kum u piskot, u kubi, sohsaw shwa ba un leit die sha iew dei ban da khein bniah nadong shadong ïa ka jinglut jingsep baroh naduh ka bai symbai, ka bai dawai sboh, ki dawai khniang ba pyndonkam, ka bai bylla ki nongtrei bad ïa lajong, kumjuh ruh ka bai kali na lyngkha sha iew kumta ter ter ban tip la ka dor ba nga mut ban die ka pynïohnong ne pynduhnong ïa phi.
Ka jinglah ban thied /Paying capacity-U nongrep haba u buh dor ïa uno uno u mar rep dei ban don kata ka jingsngewthuh kyllum ne common sense la u nongthied u dang biang ne em ïa ka dor ba la buh ban die. Naduh basdang u nongrep u dei ban buh jingmut lypa ba u mar rep ba u pynmih u thmu ban shalan tang ha Shillong ne shabar jylla ba ngi khot Export. Khamtam na bynta ki processed product kum ki shynrai powder, sohmrit ne ki umsoh dei ban song bunjait ki rukom song-ki barit, bapdeng bad baheh ba ki nongthied ha la i bor kin ïoh thied bad khamtam leilei na bynta ki customer kiba thymmai ba kin ïoh sdang mad. Ka dor u mar rep jong phi kam dei ban duna than eh ïoh phi duhnong, ne rem than ïoh ym don ba thied. Ka dei ban long kaba bit dor kaba u customer u dang lah ban thied bad um don ka jingeh ne ka jingsngewkhia.
Ka dor kaba ïa khaii lang/Price of the competitor-Haba ngi leit die jhur ne soh ha iew, ngi dei ban tip ba ym tang phi marwei ba phi leit die, dang don ruh kiwei ki nongrep ba wan die jhur ne soh sha iew. Namarkata dei ban ïajan paralok, twad jingmut lang para nongdie khamtam eh ïa ka dor ba ki ïadie lang, ka dor ban ïohnong lang ba phi lah ban die khlem shem jingeh ha iew ha hat.
Ka jaka ban die/Place-Ka jaka ban die ïa ki mar rep ka dei kata kaba lah ban pynsuk bad pynaram ïa u nongthied khlem kano kano ka jingeh.
Ki Sngi Iew/ Weekly market-Ïa u mar rep rep jong phi, ban leit die sha ki iew shnong jong phi ne sha Iewduh ha sor Shillong namar ba ka iew ka dei kata ka jaka ba ki briew ki wan ban thied, ban siew ban pet ïa ki jingdonkam ha iing ha sem.
Ki dukan shnong- Lah ruh ban die ïa ki mar rep jong phi ha ki dukan shnong,ka lad kaba long khmat bha ha ka ïaid ka ieng, ka leit ka wan ba ki briew ki ïa rung ïa mih bha ha kato ka lad ne surok.
Ki iing briew/Home visit- Lah ruh ban leit tyrwa ha ki iing briew ïa ki jhur, ki mar rep jong phi ba ki briew kin tip ïa ki mar rep rep ba phi die. Kum ki nongdie dud ba wan ai ha iing bad ki nongdie tung rymbai ba leit tyrwa ha man la ki jaka.
Die online/Online platform-Kum ha kane ka juk stad ba mynta, ïa u mar rep jong phi kum u sying, shynrai powder, khamtam ki processed product lah ruh ban die lyngba ki online platform lyngba ki social media -Facebook, youtube, whatts app. Ka Amazon Kisan ba la pynmih da ka ICAR ryngkat ka jingïatreilang bad ka Amazon kan dei ruh kawei na ki online platform ha ka khaii ka pateng ba thymmai na bynta ki nongrep.
Ban pyntip paidbah/Promotion-Ïa u mar rep jong phi lada dei uba thymmai kum ki soh blue berries, ki soh kiwi, ki soh strawberry, fruit wine, jam, jelly ne u tit Oyster Mushroom khamtam lei lei ba dang duna kiba tip, lah ban pyntip paidbah ba phi rep ïa kine ki mar rep da kaba phi ïa shim bynta ha ki prokram sorkar kum ki Exhibition, ki Mela ba ki briew kin tip paidbah bad khamtam ba ki investor na bar jylla ruh kin sakhi ïa ki mar rep ki jong phi. Ka social media ka dei kawei na ki platform ba ki nongrep ki lah ban pynsaphriang ïa ki mar rep jong ki kum ha Facebook, Youtube, Whatts app, twitter.
Ban pynmih bun jait ki jingbam/ Processing -Lait na kitei saw tylli ki mat ba kongsan ba la kdew haneng, nga kwah ban buh sa kane kawei ka mat ba ki nongrep ki dei ban pyrkhat thymmai noh bad kata ka dei ka Processing ne ban pynmih bun jait ki jingbam ha kino kino ki mar rep kiba don ka lad ka lynti. Ka por ka la dei ba ki nongrep kim dei ban hun, ban shu pynmih ïa ki mar rep jong ki tang kiba ïoh kheit na ki kper jong ki kaba ki rep ne ki fresh produces. Kum ïa u piskot ngi ïoh ban pyndonkam ïa u tang kum u jhur uba ngi shet jyngtah ha iing ha sem. Ka la donkam ba ngin pyrkhat thymmai ba ngi dei ban shna bun jait ki jingbam na ki jhur kum na u piskot ngi lah ban shna kum u achar, ki jingbam khynnah ki sweet bad kumjuh na ki jingthung kum u krai ngi lah ban shna ki jingbam Khasi, ki jingbam biscuit, ki jingdih bad na u buckwheat jarain ngi lah ban shna jingbam ba bun jait kum ki noodles, biscuit bad ki Buckwheat pillow ba ïarap na bynta kito ba shitom ha u budlum ne Spine problem. Kumba ngi tip ban kine ki jingthung U Krai bad Buckwheat ki don shibun ki jingbam vitamin, minerals kiba ïarap ïa ngi ban lait na shibun ki jingpang, kiba ai ïa ka met kaba koit ba khiah bad khamtam leilei ban lait na ka jingduhnong bad ka jingshah khniot dor ha iew ha hat.