Shillong, Naitung, 22: U Myntri Rangbah ka jylla u Conrad K. Sangma ryngkat ka jingdon lang jong u Myntri ka tnat Jngohkai Pyrthei u Bah Paul Lyngdoh u la ai khusnam “Ateliers Meghalaya Awards” sha ki hynñiew ngut ki nongshna jingshna na kylleng ka jylla Meghalaya.
Haba kren ha kane ka sngi, u Conrad ula ong, ba kane ka khusnam ‘Ateliers Meghalaya Award’ ba la sdang naduh 2021 ka dei na ka bynta kyrshan bad ban ithuh ïa ki nongshna jingshna, ki nongthaiñ jingthaiñ bad kiwei kiwei de kum shi bynta ban kyntiew ïa ka ïoh ka kot jong ki paidbah ha man la ki shnong jong ka jylla.
U Conrad ula ïathuh ba ka project ‘Ateliers Meghalaya Award’ lyngba ka Meghalayan Age Project kan long ruh ka lynti ïa ki nongshna jingshna na kylleng ka jylla ban pyninam ïa la ki tiar ki tar ba ki shna bad kum juh ruh ban pynpoi ïa ki mar jong ki sha ki ïew bapher bapher.
