Shillong, Naiwieng, 25: Kan long ka sien ka banyngkong eh ba ka Dorbar Shnong kan tei ïa ka jaka kilan met na ka bynta ki heprit bad ïa ki samla khnang ba kin pynbyrngia ïalade ha kaba pyneh dohksah bad pyngngad ka bor jabieng khamtam ha kum kane ka juk ba ka imlang ka sahlang ha kine ki sngi kiba mynta ki la nang sniew shaba palat da ka jingshah pynngop jong ki samla lud ha u drok uba la pynjot ïa kiba bun ki longing longsem.
Ïa ka jaka kilan met kaba la ai kyrteng Community Health Park la tei da ka Dorbar Shnong Lawsohtun kum shi bynta ban plie lad ïa ki paidbah nongshong ka shnong Lawsohtun hi baroh kawei ha ka kam kilan met.
Ïa kane ka park ban kilan met ka Dorbar Shnong ka la tei da ka jingnoh synñiang pisa jong ki Kontraktor kiba pyntrei ïa ka skhim Jal Jivan Mission ban pynpoi um ha manla ki tyngkong iing.
Ha kane ka sngi ba plie paidbah ïa kane ka Health Park la ïa don lang ki nongïalam shnong, ki seng longkmie, ki dkhot ka KSU bad kumjuh ruh ki samla kynthei bad shynrang jong ka shnong.
Ïa kane ka park la khap ribon da u Chief Executive Member jong ka Khasi Hills Autonomous District Council (KHADC) u Bah Pynïaid Sing Syiem uba la long kum u kongsan ha ryngkat ka jingdon lang jong u MLA barim ka Mylliem Constituency u Bah Hamletson Dohling bad kiwei kiwei.
Ha kane ka sngi la sam ïa ki jingai sngewbha ïa ki kongsan bad kumjuh ruh ïa ki lai ngut ki Kontraktor kiba pyntrei ïa ka skhim JJM bad kumjuh ruh ïa ki shlem ai jinghikai Cricket bad Football.
