Tang saw bnai ban wad bniah ïa ka tynrai long jaidbynriew ka bym lah long: Kyrsoibor

Shillong, Nailur, 02: U Bah Kyrsoibor Pyrtuh dang shen u la phah da ka jingthoh paidbah sha u Executive Member jong ka Khasi Hills Autonomous District Council (KHADC) uba peit ïa ka tnat Education u Bah Carnes Sohshang ban pan jingpynshai ha kaba ïadei bad ka jingbei pisa jong ka Council ban wad bniah ïa ka thymmei long jaidbynriew ki Khasi.
“Don shibun ban ong halor ka jingpyrkhat jong ka KHADC ban bei tyngka na ka bynta ban wad bniah ïa ka thymmei long jaidbynriew. Hynrei namarba phi lah pynmih paidbah ïa ki kyndon kumno ban wad bniah ïa ka tynrai long jaidbynriew bad ba phi lah pynmih ruh ïa ka pyrta ka shula ba phi khot ïa ki samla, ki nonghikai, ki riewwad jingtip bad kiwei ban wan shakhmat ban leh ïa kane ka kam. Kumta nga kyrpad jur ba phin sngewbha ban pynbeit shuwa ïa ki kyndon ne guideline,” ong u Bah Kyrsoi.
“Ha ka mat 1.2, phi ong ba ki jaka ban wad bniah ne Research Area kin long hapoh Khasi Hills Region bad hapoh u pud ka KHADC. Kumno kata ka research ne jingwad bniah shaphang ki kur kiba mih na ka Ïaw Shibidi kan long lada u pud jong ka jingwad u kut tang hapoh Khasi Hills,KHADC ,katba ki don bun ki kur kiba mih na ka Ïaw Shibidi kiba la saphriang kylleng ka Ri 7 Trep?” la buh jingkylli une u rangbah.
“Kaba ar, phi tyrwa ban wad shaphang ka jingnoh synniang ki Syiem. Kaba kumno ka research halor ka kur Syiemlieh, ka kur long Syiem ka Hima Nongkhlaw, kan long haba ka mih na kajuh ka Ïawbei, ka Li Dokha, ryngkat ki shipara ka Nga (Hima Sutnga), ka Pung (Hima Nongspung), ka Teng (kur Nongsteng) bad ka Lang(Kurkalang)?” u la bynrap.
“Khatduh, ban wad ban thud ïa ka tynrai long jaidbynriew tang Saw Bnai te ka bym lah ban long. Kan shu bijai ei ne kylla mulot ka jingthmu ba bha ka KHADC,” u la ong.