Jowai, Jymmang 16: Ha ka miet jong ka 15 tarik kawei ka ïing kaba dei trai da ka kong Nijanduh Phawa bad u ma Nikolas Nartiang kiba shong ba sah haka shnong Saba West Jaiñtia Hills District ka la shah thang dusmon tang na ka daw ba suba nongri taro ne ïa ki.
La ïathuh da u ma Emiki Phawa bad u ma Chilangki Phawa kiba dang don jingïadei bad katei ka longïing ba ha ka por ba thang ïa katei ka ïing ki don tang san ngut shipara ki khun katba ka kmie bad u kpa jong ki ki dang mut ban leit shim dawai da kaba sah miet ha shnong Mynksan bad kitei ki 5 ngut shipara 2 ngut ki kynthei bad 3 ngut shynrang da ka jingtieng kila leit phet rieh noh na ka katei ka jaka.
Mynta hi ka sngi katei ka longïing kala leit ban ujor syndon da ka ejahar ha Nartiang Police Station da kaba pynpaw ba ki nongïalam shnong naduh u Waheh Shnong, ki dkhot ka Executive Committee bad ka shnong hi baroh kawei namar ha kine ki sngi ba la dep la rai ban beh shnong syndon ïa katei ka longïing halor katei ka jingsuba ri taro.
Katkum katei ka ejahar la pynpaw ïa ki kyrteng jong ki briew kiba la pynpait pynpra ïa ka ïing jong ki ha ka miet jong ka 14 tarik u Jymmang. Ha ka sngi ba bud ka 15 tarik ki rangbah ka kur ki la dep ban ïakren sngewthuh bad ki nongïalam shnong halor katei ka jingshah pynpra jong ka ïing bad kumjuh ka jingshah kawang maw bad shah siat da jri ïa ki khun jong katei ka longïing.
Katba ha ka miet jong ka 15 tarik katei ka longïing kala shah wiang ding, u ma Emiki ula ong ïa kane ka jingsuba men ai ksuid e ri taro ka la mih la shibnai tam eiei mynta, da kaba ong ruh wat na ka liang ka Dorbar Shnong ka la dep rai ban beh shnong ïa ki, ka shnong kala kyntait ruh ïa katei ka longïing ha baroh ki liang wat ha ka leit ka wan ban shong ha ki kali kamai.
Haba ïakren bad u Waheh Shnong jong ka Saba ma A. Suchiang halor katei ka jingjia ula kyntait mardor da kaba ong kam dei kaba la leh da ka shnong hynrei ki don ki briew kiba shim kabu, na ka liang ka shnong ka pynlong da ka Dorbar ban wad ïa kiba donkti ha katei ka kam da kaba aiti sha ki bor Pulit.
Ki pulit ka Nartiang Police Station kila pyntip ba mynta ka sngi kila ïoh ïa kane ka jingujor halor katei ka jingshah thang katei ka longïing bad na ka liang ki jong ki kila dep ban register case ïa kane bad ka jingtohkit ka dang ïaid shakhmat ban leh ïa kaba donkam.
Lah ban pynkynmaw ba ka ïing bishar High Court ka la dep pynmih ka hukum ba ym don Dorbar Shnong ba lah ban beh shnong ne tait shnong ïa kano kano ka long ïing namar lada ki lap kano kano kaba pyrshah ki dei ban pyntip sha ki bor ka aiñ. Kane ka jingleh thombor ïa katei ka long ïing kan buh ïa ka shnong hi baroh kawei ha ka jingeh kaba khraw namar kane ka dei ka hukum jong ka ïing bishar.
