Tang lada ïakhih yn sa pynmih ïa ka result, kata ka bym lah ban long: HYC

Mawkyrwat, Jylliew 21: Ki dkhot jong ka Hynñiewtrep Integrated Territorial Organization (HITO) bad ka Hynñiewtrep Youths Council (HYC), Mawkyrwat Circle ha ka sngi Thohdieng ki shong kyllaiñ myngngor ha lad DC’s Office, Laitlawsang, South West Khasi Hills District, Mawkyrwat namar ka jingpynslem jong ka District Selection Committee (DSC) ban pynmih ïa ka resol hapoh ka South West Khasi Hills District kaba dei naduh u snem 2019 bad mynta la jan dap 5 pura.
Haba kren ha ka jingïalang, u samla Pynskhem Kharjahrin, Education Cell HYC South West Khasi Hills District u la ong ba jingpynlong ïa ka jingïashong kyllaiñ myngngor ka long halor ka nongrim ka jingpynslem jong ka ophis jong u Deputy Commissioner, South West Khasi Hills District ban pynmih paidbah ïa ki resol lyngba ka District Selection Committee na ka bynta ki kam bapher bapher hapoh ka South West Khasi Hills District.
U la pynkynmaw ruh ba ïa kam ba lait ladep ban pynbna naduh ka 18 tarik, ‘Naiwieng, 2018 bad ka jingkylli ka mih ba balei ka shim por haduh 2 bad 3 snem shiteng ban pynmih ïa ka resol.
“Hooid, ïa ka eksamin ladep ban pynleh la kham slem hynrei balei ka shim por 2 bad 3 snem shiteng ban pynmih paidbah ïa ki resol”? u la buh jingkylli.
Namarkta, kane ka la long thik kum ka jingleh beiñ ïa ka hok jong ki nongaplai kam ne ki samla wad-kam wad-jam namar ha kawei na ki kyndon la thoh ha ka por ba ki nongaplai ki dei ban don ha ka karta kaba 18 haduh 27 snem katkum ka 1 tarik, Kyllalyngkot, 2019 bad haba ka slem pat ka jingpynmih ïa ka resol ka snem jong ki nongaplai kan nym ïa tara shuh ba ka la long palat snem.
“Lada kita ki nongpynbeit ki peit naduh ki koma, ki phul-stop kam lah ban long ba ka shipor haduh 2 bad 3 snem”, ong u samla Pynskhem bad buh jingkylli ruh ba balei ka shim por, hato ki duna ki nongpynbeit ne kumno, bad lada kum ka ophis u Deputy Commissioner ka duna ki nongpynbeit kum ki nongïalam sengbhalang ki kloi ban ïarap namar ma ki ruh ki don ïa ki briew kiba la kot ka bor ban leh ïa kata.
U la ïathuh ruh hadien ka jingleit ïa kynduh ïa u Deputy Commissioner ryngkat ka jingthoh ha ka sngi Palei na ka liang ka ophis jong u ha ka por mynmiet ki la pyllait paidbah ïa ka resol jong ka LDA bad kane ka la long kawei na ki jingjop jong ka jingdawa.
Kumta u la ai ka kyrwoh shwa ki bor ba dei peit, ba wat ïalehkai bad ki samla wad-kam wad-jam namar tang lada ïa khih, ki sa pynmih ïa ka resol, kata ka bym lah ban long nangta shuh ki dawa na ka ophis jong u DC kan dei ban pynslem ban pynmih ïa ki kam kiba dan sah ym tang ïa ka LDA bad lada ym ïohi ïa u soh, kin sa shi biang da kiwe pat ki lad ki lynti ban dawa.
Kiwei de kiba la ai jingkren ki long u Bah Thomas Thyrniang, President HITO, Mawkyrwat Circle, Bah Bitnam Lyngdoh, Vice President ka HITO, South West Khasi Hills District bad u Bah Wallam Syienïong, Chairman ka Synjuk ki Seng Samla Shnong ka South West Khasi Hills District.