Tang katto katne bnai ba dep pyntrei ïa ka Surok Nongtalang-Dawki sdang paw thliew biang ka surok : JSU

Jowai, Naitung 08 : Ka Jaiñtia Students’ Union (JSU) War Jaiñtia ka dap da ka jingsngew lyngngoh kaba jur ha kaba ïadei bad ka jingshna ïa ki surok ha kylleng ki jaka hapoh ka jylla khamtam bad ka surok kaba dang shu dep ban pynshna ha kine ki khyndiat bnai kata ka surok NH 40 E naduh na Nongtalang sha Dawki uba ïoh jingïarap ym duna ïaka 43 klur 70 lak ba la bei pisa da ka sorkar India.
Hynrei kaba sngew lyngngoh ba kane ka surok kala sniew biang kumjuh kumba ju long ha u snem ba la dep wad hadien tang katto katne bnai ba la dep shna maramot ïa ka.
Shuh shuh ka seng ka shem bad ka lap dalade ba kane ka surok kam biang satia ki nala um na rud jong ka surok bad ka rukom pyntrei kam da biang kaba la wanrah ïa ka jingsniew kloi jong ka.
Halor kane ka seng ka dawa na ka tnad PWD kaba dei peit ïa kane ka surok ban pynbor ïa ka Company ba trei biang kham bha shuh shuh ïa ka bad ban pynbiang ïaki nala um, khnang ba ka um por slap kan ym tuid sha surok namar kane kan khlong lut ïaka rong surok.
Ka seng haka juh ka por ka pyrshah jur ïa ka company ba siang ïa kane ka surok ha ka por slap da kaba ai jingmut ba dei ban siang ha ka por ba khuid ka suiñ bneng khnang ban lait naka jingsniew ba khah khah ka surok.