Shillong, Naitung 08 : Ka HYC Umïam Circle ha ka sngi Saitjain ka la leit ban khynra labour bad trading license ïa ki nongtrei bar jylla kiba trei ha ki shnong kiba hap hapoh ka Umïam Circle kata ha shnong Sumer bad Lad Umsaw.
Katkum ka kyrwoh ba la phah da u Shainstar Kharpan President jong ka Circle la ong ba ha katei ka jingleit khynra ki la lap ba bun ki nongbylla bar jylla kim don satïa ïa kitei ki kot ki sla kiba biang hynrei ki la ïoh ban trei laitluid ha katei ka jaka.
Halor kane, na ka liang ka seng ka kyntu ïa ki trai dukan bad ki seng nangne shakhmat ba ha shwa ba kin wan ïalam ïa ki nongbylla bar jylla ki dei ban da pynbiang shwa ïa ki kot ki sla kiba biang.
Ka la ong ruh ba nangne shakhkmat kan ïai bteng ban khynra ïa ki trading license jong ki bar jylla ha baroh kawei ka thain jong ka Umïam Circle, ong ka kyrwoh.
