Bah Tesar Marweiñ, Nonglang WKH
Nongstoiñ, Jymmang 03: Ka jingleit beh mrad ha ki por ba mynshuwa ka kynrei bha ha man la ki shnong khamtam eh ha ki nongkyndong. Ka dei ruh ka kam kaba sngew tynnad bad kaba long ruh kum ka jingleh kmen jong kito ki briew kiba sngew tynnad ïa katei ka kam.
Ki nongshong shnong ha ki por ba mynshuwa kim pat don suloi satia, hynrei ki tiar ba kongsan ba ki pyndonkam haba ki leit beh mrad ki dei ka ryntieh u khnam bad u sum. Haba ki nongshong shnong ki leit beh mrad kim leit tang uwei ne ar ngut, hynrei ki leit da ka kynhun kata naduh ki tymmen, ki samla bad wat ki khynnah ruh lada ki dei kiba la lah ban shang ïa ki khlaw ki btap bad ban mareh na kawei ka jaka sha kawei pat ka jaka.
Nalorkata ka kynhun ki nongbeh mrad, ka dei ban don ym duna ïa ka khat ar ngut shaneng bad kaba sngew tynnad ka long ba mynstep shuwa ba kin leit beh mrad, don la u nongpyrta shnong ban pynbna ba ha kata ka sngi kin leit beh mrad. U nongpyrta u pynbna ruh ha kajuh ka por ïa ka jaka ba kin ïakynduh lang shuwa ban rung sha khlaw ryngkat bad ki ksew beh ksew shang, kiba tbit ban sma dien ïa ki mrad la ki dei ki skei, ki sier, ki sniang khlaw bad kiwei kiwei.
Nangta ki ïa pyni ïa ki ryntieh, ki khnam bad ki sum bad lada don kino kino ki bym don ïa kitei, ki trai ki dei ban don beit ka wait prat bad ïa ki bym don tiar ki ju phah ban leit khynra sha poh khlaw ryngkat ki ksew ban lap ïa ki mrad. Nalor kata ïa kito kiba la biang ki khnam bad ryntieh, ki phah sha ki phang bapher bapher ban leit ap ktem.
Kaba phylla ka long ba ki nongbeh mrad ki don ka jingshemphang kaba maïan bha. Ki tip ha kino ki phang ba u skei, u sier ne u sniang khlaw ki phet haba ki ksew ki la beh ïa ki. Ki ba rung sha khlaw ryngkat ki ksew ruh, ki la antad ïa ka por haduh ba ki nongap ktem ki la poi lut.
Tang mar shu rung hapoh khlaw ki la phah ïa ki ksew sha khmat bad ha ka por ba u ksew u la lap dien ïa u skei ne sier, u wiar bad kyrkait shongshit ka khlaw ka btap bad kaba phylla ka long ba shisien ba leit beh skei, sier ne sniang khlaw, ki ksew beh wat lada ki don kiwei kiwei ki mrad kiba kham rit kim ju beh ïa ki, hynrei ki beh beit thik tang ïa u mrad ba ka kynhun ki nongbeh mrad ki la thmu ban beh.
Kaba kham sngew tynnad shuh shuh ka long ka kynhun ki nongbeh mrad ha ki por mynshuwa, haba ki la ïoh ïa ki mrad ba ki leit beh ki pyrta bad khot lang ïa baroh kiba wan bad lada ka por ka dang biang ki ïashong pyrkhat biang ban leit sha kawei pat ka jaka.
Nangta lada lap biang ïa ki dien skei ne sier ki beh thong haduh ban da miet bad yn da la miet pat ki ïa kynduh biang shi jaka bad leit shaw ïa u mrad ba ki la ïoh. Nangta ynda kiba leit shaw ki la wan poi ki sa jied napdeng ka kynhun uno napdeng jong ki u ba nang bha ban phawar, ki phah ïalam ïa u sha khmat ba un phah war da ki ktien kiba sngew tynnad.
Haba u la kut ban phah war baroh ki ïapyrta lang ‘hoi kiw’ hoi kiw’ baroh shilynter lynti, haduh ban da poi ha ka ïing jong u ba siat nyngkong, namar wat lada u mrad um kyllon ne ïap hajuh ha ka por ba u khnam jong u ba siat nyngkong u dei ruh bad u ïap ha ka jingsiat jong uwei pat, ka rukom jong ki ka long ba dei ban rah sha ïing jong u ba siat nyngkong bad haba sam doh kyndang ruh ïa ka khlieh u dei ba siat nyngkong u dei ban ïoh.
Nalor kata ka jingbeh mrad ha ki por mynshuwa kam dei tang namar ba ki kwah bam doh hynrei ka dei ruh ka jingmlien kaba pynsngew tynnad. Ha kajuh ka por ha ka kynhun ki nongbeh mrad kam ju don ka jingïathnum uwei ïa uwei pat ne ka mynsiem khoh ñïoh ha ka por ba sam doh kyndang, namar lada don kiba kum kita lada ki leit beh mrad biang kin ym ïoh shuh lano lano ruh, wat lada ki leit beh da ki taïew bad ki bnai ruh.
Lada ka kynhun ka leit beh mrad biang shi sien arsien lai sien bad kim ïoh ha ka sien kaba saw ynda baroh ki rang beh mrad ki la poi lut ha ka jaka ba ki ia kut ki kylli ki pyrthew ïa uwei pa uwei mano ba bakla, mano ba khoh ñïoh mynsiem, mano ba leh tam ïa ka bym dei ban leh.
Lada don kiba kum kita ki sneng ki kraw bad ki kyntu ba kim dei shuh ban dang leh kumta bad ki pyneh la ka ksaw ka kpong ha u khnam bad ka ryntieh, ki syrpai ki syrpud ïa ki lait ki let bad ki jingbakla, ki sa sdang ban phah rung biang sha poh khlaw. Lada ka ksan ka rngiew ka ïeng ka daw ka ksaw ka kpong ka wan phai biang tang katto katne por ki la ïoh ban pynkyllon biang ïa u mard ba ki leit beh.
Ha kine ki por kiba mynta pat ka jingleit beh mard da ka kynhun kam don shuh, namar la bun palat ki suloi ïa ki briew, ha kaba ki la ïabeh ban leit marwei marwei bad ki la pynlong ruh ïa ka kam leit siat mrad kum ka kam ban kamai pisa. Dei na kane ka daw ba ki mrad khlaw ki la nang duh suki pa suki bad kan poi ka por ba wat ïa u risang ruh ki hap ban siat da ka suloi.